Ինչո՞ւ է աշխատանքից ազատվել Յոլյանի անվան արյունաբանական կենտրոնի տնօրենը. Առողջապահության նախարարության պարզաբանումը

Սամվել Դանիելյանը Յոլյանի անվան արյունաբանական կենտրոնի տնօրենի ժամանակավոր պաշտոնակատարն էր, նրա պաշտոնավորման ժամկետը լրանում էր հունիսի 7-ին, իսկ Դանիելյանի հետ պայմանագիրը լուծարվել է մայիսի 15-ին, այս մասին Factor.am-ի հետ զրույցում հայտնեց Առողջապահության նախարարի մամուլի խոսնակ Մարիամ Ծատրայանն՝ արձագանքելով Սամվել Դանիելյանի աշխատանքից ազատման մասին լուրերին։

Ճշտող հարցին՝ ինչու է պայմանագիրը լուծարվել վերջնաժամկետից մի քանի օր շուտ, ԱՆ խոսնակը մեկնաբանեց․ «Իրավական գործընթացով է ազատվել, նախարարությունն այդպես է նպատակահարմար գտել»։

Նշենք՝ Հայաստանի մանկական քաղցկեղի և արյան հիվանդությունների կենտրոնի ղեկավար Գևորգ Թամամյանն էր ֆեյսբուքի իր էջում գրել, որ աշխատանքից ազատվել է Յոլյանի անվան արյունաբանական կենտրոնի տնօրեն Սամվել Դանիելյանը։ Նա նաև հայտնել էր,  որ ի պատասխան այդ որոշման` ինքը նույնպես աշխատանքից ազատվելու դիմում է ներկայացրել։ Ըստ Թամամյանի՝ Դանիելյանի ազատումը քաղաքական պատճառներ ունի։ Առողջապահության նախարարությունն այս պնդումը չի մեկնաբանում։ Տնօրենի ազատման պատճառների վերաբերյալ մեզ չհաջողվեց պարզաբանում ստանալ նաև Յոլյանի անվան արյունաբանական կենտրոնից։

Ազատմանն անդրադարձել է «Տավուշը հանուն հայրենիքի» շարժումը․ «Քիչ առաջ շարժմանն աջակցելու և Սրբազանի հետ դեպի Երևան երթի ժամանակ ողջագուրվելու համար աշխատանքից ազատվել է Արյունաբանության և ուռուցքաբանության կենտոնի տնօրեն, բ. գ. թ. դոցենտ Ս. Դանիելյանը»,- ասված է շարժման ֆեյսբուքյան էջում:

Մանյա Պողոսյան