15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Վրաստանի 9 քաղաքացի է ձերբակալվել եվրոպական գրադարաններից հնագույն գրքեր գողանալու համար
Քաղաքականություն
26.04.2024 | 13:14
Եվրոպական հետաքննական մարմիններին հաջողվել է դուրս գալ հանցագործների հետքի վրա, որոնք եվրոպական գրադարաններից հնագույն ռուսական գրքեր են գողացել։ Եվրոպոլի հաղորդմամբ՝ Վրաստանի քաղաքացիություն ունեցող յոթ կասկածյալներ ապրիլի 23-ին և 24-ին ձերբակալվել են Վրաստանում, Լատվիայում, Լիտվայում, Ֆրանսիայում և Էստոնիայում, ևս երկուսը գտնվում են Ֆրանսիայում դատական հսկողության տակ, գրում է DW-ի ռուսական ծառայությունը։
Վրաստանում ու Լատվիայում ավելի քան 100 իրավապահներ են ներգրավվել և խուզարկություններ իրականացրել 27 վայրերում, ասվում է եվրոպական ոստիկանության զեկույցում։ Բացի չորս կասկածյալների ձերբակալությունից՝ նրանք նաև առգրավել են ավելի քան 150 գիրք։ Ֆրանսիայում գողացված գրքերից մեկն արդեն վերադարձվել է։
Ընդհանուր առմամբ, հանցավոր խումբը պատասխանատու է 2022 և 2023 թվականներին Գերմանիայի, Էստոնիայի, Լատվիայի, Լիտվայի, Լեհաստանի, Ֆինլանդիայի, Ֆրանսիայի, Չեխիայի և Շվեյցարիայի ազգային ու պատմական գրադարաններից առնվազն 170 հազվագյուտ գրքերի գողության համար:
Հանցագործների թիրախում հիմնականում ռուս գրողների գրքեր են եղել, մասնավորապես՝ Ալեքսանդր Պուշկինի կամ Նիկոլայ Գոգոլի ստեղծագործությունների առաջին հրատարակությունները։ Ֆինանսական վնասը գնահատվում է շուրջ 2,5 միլիոն եվրո։
«Գողացված պատմական արտեֆակտների մի մասը վաճառվել է Սանկտ Պետերբուրգի և Մոսկվայի աճուրդների տների միջոցով, ինչը փաստացիորեն դրանք դարձնում է անվերականգնելի»,- ասվում է Եվրոպոլի հայտարարության մեջ:
Գերատեսչությունը նշում է, որ Վրաստանի իշխանությունները հետաքննություն են սկսել կազմակերպված հանցավոր խմբի մի քանի անդամների ինքնությունը և գտնվելու վայրը պարզելու համար։ Eurojust-ի աջակցությամբ և ֆինանսավորմամբ ստեղծվել է համատեղ քննչական խումբ՝ Ֆրանսիայի, Վրաստանի, Լիտվայի, Լեհաստանի, Շվեյցարիայի, ինչպես նաև Եվրոպոլի մասնակցությամբ։
