22.07.2026 | 16:02
Together Alone ֆիլմը «Ոսկե ծիրան»-ի միջազգային ժյուրիի հատուկ հիշատակման մրցանակի է արժանացել
Թուրքիայում քուրդ լրագրողներ են ձերբակալվել «ահաբեկչական գործունեության համար»
Քաղաքականություն
24.04.2024 | 23:30
Թուրքական ոստիկանությունը մի շարք խուզարկություններ է իրականացրել Ստամբուլում, Անկարայում և հարավ-արևելյան Ուրֆա նահանգում, ինչի արդյունքում ինը քուրդ լրագրող է ձերբակալվել, գրում է Turkish Minute-ը։
Ձերբակալվածների թվում է Mezopotamya-ի թղթակից Մեհմեդ Ասլանը, որը բերման է ենթարկվել Անկարայում գտնվող իր տնից: Ուրֆայում ձերբակալվել է նաև լրատվամիջոցի նախկին լրագրող Դողան Քայնաքը։ Ստամբուլում օպերացիան ընդգրկել է տարբեր լրատվամիջոցների մի քանի լրագրողների՝ Էսրա Սոլին Դալիին, Yeni Yaşam թերթից Էնես Սեզգինին, Սալիհա Արասին, Յեշիմ Ալիչին, Բեստե Արգաթ Բալջըին, Շիրին Էրմիշին և Էրդողան Ալայումաթին:
Իշխանությունները սահմանափակումներ են մտցրել կալանավորված լրագրողների նկատմամբ՝ արգելելով նրանց հանդիպել իրենց փաստաբանների հետ, քայլ, որը լուրջ մտահոգություններ է առաջացրել մարդու իրավունքների հետ կապված:
Լրագրողներից մեկի ազգականը, որը խնդրել է չհրապարակել իր անունը, լրատվամիջոցներից մեկին ասել է, որ ոստիկանները լրագրողի տանը հայտնվել են լուսադեմին։ Նա նշել է, որ լրագրողների ընտանիքները տեղեկացվել են, որ նրանց ձերբակալությունները «հետաքննության մաս են, որը բացվել է 2022 թվականին ահաբեկչական գործունեության համար»։
Հաղորդվում է նաև, որ ոստիկանական շրջայցեր են տեղի ունեցել Բելգիայում գործող քրդական լրատվամիջոցներում, որտեղ ոստիկանները ներխուժել են Stêrk TV և Medya Haber հեռուստաընկերությունների գրասենյակներ։
Թուրքիայում քուրդ լրագրողները հաճախ են ենթարկվում հետապնդումների, դատավարության և բանտարկության՝ Քուրդիստանի աշխատավորական կուսակցության (PKK) հետ կապերի մեղադրանքով։
