Էրդողանը Հայոց ցեղասպանության տարելիցին հերթական ժխտողական ուղերձով է հանդես եկել

Թուրքիայի նախագահ Ռեջեփ Թայիփ Էրդողանը Հայոց ցեղասպանության տարելիցին ցավակցական ուղերձ է հղել Պոլսի Հայոց պատրիարքին և հայ համայնքին (նա ուղերձ է հղում 2012 թվականից)։ Պատրիարքարան ուղարկված ուղերձն ընթերցվելու է այսօրվա պատարագի ժամանակ։ Թուրքիայի նախագահը, ինչպես սպասվում էր, կրկին ժխտել է Հայոց ցեղասպանության իրողությունը։

«Այսօր ևս մեկ անգամ հարգանքով եմ հիշում Առաջին համաշխարհային պատերազմի ծանր պայմաններում իրենց կյանքը կորցրած Օսմանյան կայսրության հայ քաղաքացիներին և իմ ցավակցությունն եմ հայտնում նրանց ժառանգներին։ Ես աղոթում եմ օսմանյան հասարակության բոլոր անդամների համար, որոնք զոհվել կամ նահատակվել են հակամարտությունների, ապստամբությունների, ավազակային շարժումների և ահաբեկչական հարձակումների հետևանքով: Օսմանյան հողերում Առաջին համաշխարհային պատերազմի պատճառած ավերածությունները խորը հետք են թողել մեր հիշողություններում։ Մեր նախնիներից ժառանգած խաղաղության և հանգստության մթնոլորտի շարունակությունը հնարավոր է միայն մեր համատեղ ջանքերով»,- նշել է Էրդողանը։

Նա պնդել է, թե, իբր, «Թուրքիայի հայ քաղաքացիների անվտանգությունը, բարեկեցությունն ու երջանկությունը, որոնք հարստացրել են Անատոլիական հողերը իրենց մշակույթով ու այլ գործերով, այսօր էլ երաշխավորված են»։ Ըստ Էրդողանի՝ «թույլ չեն տալիս և թույլ չեն տա, որ թեկուզ մեկ հայ քաղաքացի իրեն օտարված կամ երկրորդ կարգի մարդ զգա իր հայրենիքում»։

«Կարևոր է, որ մենք անդրադառնում ենք պատմության իրադարձություններին մտքի, խղճի և գիտության առաջնորդության ներքո՝ թույլ չտալով արմատական ​​դիսկուրսներ, մարգինալացում և ատելության լեզու: Կարեկցանքի հաստատումը, առանց մեր ազգային հիշողության մեջ դաջված իրադարձությունները տարբերելու, կկանխի նաև ատելության սերմերի արմատավորումը։ Մենք հավատում ենք, որ աշխարհը շրջապատող բռնության և պատերազմի պարույրից ապագա սերունդներին պաշտպանելու ճանապարհը մեր ապագան միասին կառուցելն է՝ այն դասերի լույսի ներքո, որոնք մենք կքաղենք մեր ընդհանուր ցավից»,- հայտարարել է Թուրքիայի ղեկավարը։