07.10.2026 | 23:48
Արթուր Դանիելյանը կալանավորվեց
Եվրախորհրդարանը կքննարկի Ադրբեջանում բռնաճնշումների հարցը
Քաղաքականություն
19.04.2024 | 17:52
Եվրախորհրդարանն ապրիլի 24-ին քննարկելու է Ադրբեջանում մարդու իրավունքների հետ կապված իրավիճակը։ Եվրոպացի պատգամավորները դիտարկելու են «Քաղաքացիական հասարակության դեմ Ադրբեջանում վերջին բռնաճնշումները․ դոկտոր Գուբադ Իբադօղլուի և Իլհամիզ Գուլիևի գործերը» բանաձևը, տեղական լրատվամիջոցներին հայտնել է Իբադօղլուի եղբայր Գալիբ Բայրամովը։
Փաստաթղթում անդրադարձ է կատարվում նաև Abzas Media-ի և Toplum TV-ի լրագրողների դեպքերին: Բանաձևը քվեարկության է դրվելու ապրիլի 25-ին։
2023 թվականի սեպտեմբերին Եվրախորհրդարանն արդեն բանաձև ընդունել է Իբադօղլուի գործի վերաբերյալ՝ պահանջելով նրան ազատ արձակել։
Նշենք, որ ակտիվիստ Իլհամիզ Գուլիևն էլ ձերբակալվել է թմրանյութերի ապօրինի շրջանառության մեղադրանքով այն բանից հետո, երբ նա, լինելով ոստիկանության ոչ պաշտոնական աշխատակից, Abzas Media-ին պատմել է, թե ինչպես է ոստիկանությունը կեղծում թմրամիջոցների հետ կապված քրեական գործերը։
Վերջին ամիսների ընթացքում Ադրբեջանում մաքսանենգության մեղադրանքով ձերբակալվել են տարբեր լրատվամիջոցներ ներկայացնող շուրջ երկու տասնյակ լրագրողներ։ Խուզարկություններ են իրականացվել Abzas Media-ի, Toplum TV-ի գրասենյակներում և որոշ լրագրողների բնակարաններում։ Միջազգային կառույցները կոչ են անում Ադրբեջանի իշխանություններին դադարեցնել բռնաճնշումներն ու լրագրողներին ազատ արձակել։
Էմմա Չոբանյան
