Էրդողանը կարող է լքել իշխող կուսակցության ղեկավարի պաշտոնը

Թուրք լրագրող Քյուրշադ Օղուզը կիսվել է մարտի 31-ի ՏԻՄ ընտրությունների արդյունքում պարտված իշխող Արդարություն և զարգացում կուսակվության, դրա առաջնորդ ու երկրի ղեկավար Ռեջեփ Թայիփ Էրդողանի մասին կուլիսային որոշ տեղեկություններով, գրում է Arti Gercek-ը։

«Այն մարդիկ, ում հետ ես զրուցել եմ, ասում են՝ կուսակցությունում բոլորն այս պահին նյարդային են, նախագահ Էրդողանը ոչ մեկին չի ասում, թե ինչ է անելու, նա միայն ընտանիքից մի քանի հոգու հետ է խոսում։ Ռամադանի ժամանակ նա ընդհատում էր ծոմը, աղոթք անում և վերադառնում իր սենյակ: Անհասկանալի է, թե նա ինչ է անում հենց հիմա: Մեծ անհանգստություն կա»,- ասել է Օղուզը՝ նշելով, որ ըստ տեղեկությունների՝ Էրդողանը պատրաստվում է փոփոխություններ անել կառավարության կազմում։

Նշվում է, որ իշխող ԱԶԿ-ի՝ ապրիլին նախանշված համագումարն անցկացվելու է նոյեմբերին։

«Չեմ կարծում, որ դա տեղի կունենա, բայց այն մարդիկ, ում հետ ես զրուցել եմ, ասացին՝ Էրդողանը կարող է հեռանալ ԱԶԿ-ի նախագահությունից»,- ասել է լրագրողը։

Նշենք, որ Թուրքիայում մարտի 31-ի ՏԻՄ ընտրությունների արդյունքներով՝ ընդդիմադիր Ժողովրդահանրապետական կուսակցությունը (CHP) պատմական հաղթանակ է գրանցել, իսկ Էրդողանի գլխավորած կուսակցությունը, 2002 թվականին իշխանության գալուց ի վեր, ամենամեծ պարտությունն է ունեցել։ CHP-ն հավաքել է ձայների ավելի քան 37,76 տոկոսը, ԱԶԿ-ն՝ 35,48 տոկոսը։ Անկարայում գործող ընդդիմադիր քաղաքապետ Մանսուր Յավաշը հավաքել է ձայների 60,38 տոկոսը, ԱԶԿ-ի թեկնածու Թուրղութ Ալթինոքը՝ 31,69 տոկոսը, Ստամբուլում գործող քաղաքապետ Էքրեմ Իմամօղլուն՝ 51,14 տոկոսը, Էրդողանի թեկնածու Մուրադ Քուրումը՝ 39,59 տոկոսը։ Իմամօղլուն Էրդողանի հիմնական քաղաքական մրցակիցն է, որը, չնայած իշխող ուժի մեծ ջանքերին, կարողացավ կրկին հաղթել Ստամբուլի ընտրություններում։

Էմմա Չոբանյան