26.06.2026 | 12:19
Զելենսկին հայտարարել է Ռուսաստանի նկատմամբ «40-օրյա ազդեցության գործողության» մասին՝ պատերազմը դադարեցնելու համար
Հակոբ Ասլանյանի միջադեպով անցնող Սամվել Վարդանյանին ձերբակալության պահման վայրից տեղափոխել են ՔԿ
Հասարակություն
17.04.2024 | 11:16
ԱԺ «Քաղաքացիական պայմանագիր» խմբակցության պատգամավոր Հակոբ Ասլանյանի հետ տեղի ունեցած միջադեպի գործով անցնող Սամվել Վարդանյանին առավոտյան ձերբակալության պահման վայրից տեղափոխվել են Քննչական կոմիտե:
Վարդանյանի պաշտպան Ռուբեն Մելիքյանը լրագրողների հետ զրույցում ասաց՝ իրենք կասկածներ ունեն, որ տեղափոխման ժամանակ կարող է կրկնվել Սամվել Վարդանյանին խոշտանգելու դեպքը:
«Ես և իմ գործընկեր փաստաբան Վարազդատ Հարությունյանը բարձրաձայնել ենք խոշտանգման փաստի մասին: Լրատվամիջոցների հաղորդումը հիմք է քրեական վարույթ նախաձեռնելու համար, սակայն մենք երեկ չտեսանք, որ քրեական վարույթ նախաձեռնվի: ՔԿ-ն հայտարարություն արեց, ասելով՝ մեզ չեն դիմել, դրա համար վարույթ չենք նախաձեռնել: Հատուկ չենք դիմել, որովհետև հիմք ունենք տարբերակված մոտեցում ցույց տալու համար: Վստահեցնում եմ, որ եթե հակառակ մի բան լիներ, ընդունելու էին լրատվամիջոցների հաղորդումը որպես հիմք»,- նշեց Մելիքյանը։
Նրա խոսքով՝ իրենք վստահ չեն, որ հիմա էլ Սամվել Վարդանյանին ուղեկցողները «նորից բնական կարիքների հարց չեն ունենա և դրա արդյունքում ինչ-որ դիմակավորված անձանց միջամտություն չի լինի»:
Նշենք՝ ՔՊ-ական պատգամավոր Հակոբ Ասլանյանի հասցեին հասարակական տրանսպորտում վիրավորական արտահայտություններ հնչեցրած Սամվել Վարդանյանի պաշտպաններ Ռուբեն Մելիքյանն ու Վարազդատ Հարությունը հայտարարել էին, որ միջադեպից հետո դիմակավորված անձինք ծնկի են բերել Սամվել Վարդանյանին, թքել նրա վրա և սեռական բնույթի հայհոյանքներ հնչեցրել։ Պաշտպանների պնդմամբ՝ դա կազմակերպվել է հենց ՔՊ-ի կողմից:
ՆԳՆ մամուլի խոսնակ Նարեկ Սարգսյանը Factor.am-ին փոխանցել է, որ Սամվել Վարդանյանին ծեծի ենթարկելու վերաբերյալ հայտարարությունների առթիվ ծառայողական քննություն է նշանակվել ՆԳՆ ներքին անվտանգության և հակակոռուպցիոն վարչությունում.
Հիշեցնենք, որ ՔՊ-ական պատգամավոր Հակոբ Ասլանյանի հասցեին հասարակական տրանսպորտում վիրավորական արտահայտություններ հնչեցրած Սամվել Վարդանյանը ձերբակալված է, նախաձեռնվել է քրեական վարույթ խուլիգանության հատկանիշներով:
