Պուտինն ու Ռաիսին հեռախոսազրույցում քննարկել են Մերձավոր Արևելքում իրավիճակը

ՌԴ նախագահ Վլադիմիր Պուտինն ու Իրանի նախագահ Էբրահիմ Ռաիսին հեռախոսազրույց են ունեցել։ Կրեմլի հաղորդմամբ՝ հեռախոսազրույցը տեղի է ունեցել  իրանական կողմի նախաձեռնությամբ։

Նշվում է, որ մանրամասն քննարկվել են Դամասկոսում իրանական դիվանագիտական ​​ներկայացուցչության վրա իսրայելական օդուժի հարվածից հետո Մերձավոր Արևելքում սրված իրավիճակը և Իրանի կողմից ձեռնարկված պատասխան քայլերը։ Վլադիմիր Պուտինը հույս է հայտնել, որ բոլոր կողմերը ողջամիտ զսպվածություն կցուցաբերեն և թույլ չեն տա առճակատման նոր փուլ՝ հղի ամբողջ տարածաշրջանի համար աղետալի հետևանքներով։

Իր հերթին, Էբրահիմ Ռաիսին նշել է, որ Իրանի գործողությունները կրել են հարկադիր և սահմանափակ բնույթ։ Միևնույն ժամանակ, նա ընդգծել է՝ Թեհրանը հետաքրքրված չէ լարվածության հետագա սրմամբ։

«Երկու կողմերն էլ հայտարարել են, որ Մերձավոր Արևելքում տեղի ունեցող իրադարձությունների հիմնական պատճառը պաղեստինա-իսրայելական չլուծված հակամարտությունն է։ Այս առումով հաստատվել են Ռուսաստանի և Իրանի սկզբունքային մոտեցումները Գազայի հատվածում անհապաղ զինադադարի օգտին՝ մեղմելով ծանր հումանիտար իրավիճակը և պայմաններ ստեղծելով ճգնաժամի քաղաքական և դիվանագիտական ​​կարգավորման համար»,- ասվում է հաղորդագրության մեջ։

Ռուս-իրանական հարաբերությունների արդի հարցերի շուրջ մտքեր փոխանակելիս կողմերը ցանկություն են հայտնել տարբեր ոլորտներում երկկողմ համագործակցության հետագա զարգացման, այդ թվում՝ փոխշահավետ ենթակառուցվածքային նախագծերի իրականացման հետ կապված։

Բացի այդ, Վլադիմիր Պուտինը շնորհավորել է Էբրահիմ Ռաիսիին և Իրանի բոլոր մահմեդականներին Ռամադան ամսվա ավարտի կապակցությամբ