01.05.2026 | 09:46
Աշխատում է քաղաքացին՝ զարգանում է տնտեսությունը՝ ապահովելով պետության առաջընթացը․ Ալեն Սիմոնյան
ՌԴ քննչական մարմինը երկարացրել է Ալեքսեյ Նավալնիի մահվան հետ կապված նախաքննության ժամկետը
Քաղաքականություն
10.04.2024 | 16:56
ՌԴ Յամալո-Նենեց ինքնավար շրջանի քննչական կոմիտեի տնօրինությունը ռուս ընդդիմադիր քաղաքական գործիչ Ալեքսեյ Նավալնիի մահվան հետ կապված նախաքննության ժամկետը երկարացրել է մինչև ապրիլի 20-ը։ Այս մասին հայտարարել է ընդդիմադրի հիմնադրած Հակակոռուպցիոն հիմնադրամի ղեկավար Իվան Ժդանովը, գրում է Current Time-ը։
«Այսինքն՝ Ալեքսեյ Նավալնիի մահվան պատճառների մասին պետությունից դեռևս պաշտոնական տեղեկատվություն չկա»,- նշել է նա։
Քննչական կոմիտեից հայտնել են, որ առաջին ստուգման արդյունքներով քննությունը մերժել է քրեական գործ հարուցել, սակայն այս որոշումը չեղարկվել է և մարտի 21-ին ստուգման նյութերն ուղարկվել են հետաքննության։
Հիշեցնենք՝ Ռուսաստանի Յամալո-Նենեց ինքնավար շրջանի դաշնային քրեակատարողական ծառայությունը փետրվարի 16-ին հայտարարեց Ալեքսեյ Նավալնիի մահվան մասին։ Գերատեսչության տվյալներով՝ քաղաքական գործիչը «զբոսանքից հետո իրեն վատ է զգացել՝ գրեթե անմիջապես կորցնելով գիտակցությունը»։ Վերակենդանացման միջոցառումներն արդյունք չեն տվել։
Ալեքսեյ Նավալնիի մահից հետո անհայտ էր դիակի գտնվելու վայրը։ Միայն մեկ շաբաթ անց է մայրը՝ Լյուդմիլա Նավալնայան կարողացել տեսնել որդու մարմինը։ Քննիչները նրան ասել են, որ մարմինը չեն հանձնի երկու շաբաթ, քանի որ այն, իբր, ուղարկվել է քիմիական փորձաքննության։
Նավալնայան բողոք է ներկայացրել Քննչական կոմիտեի գործողությունների դեմ, իսկ արտերկրում գտնվող տասնյակ հայտնի ռուս հասարակական գործիչներ հանդես են եկել Նավալնիի մարմինը մորը վերադարձնելու պահանջով։ Ի վերջո, փետրվարի 24-ին որդու մարմինը հանձնվել է Լյուդմիլա Նավալնայային։
