10.09.2026 | 23:04
ԿԳՄՍ նախարարը մանկավարժների հետ ոլորտային հարցեր է քննարկել
«Իշխանությունները պարտավոր են պատասխանատվության ենթարկել մեղավորներին». HRW-ը՝ «Սասնա ծռերին» ծեծի ենթարկելու մասին
Հասարակություն
10.07.2017 | 15:22
«Զինված ընդդիմադիր խմբի 4 անդամ Հայաստանում դատաքննության ժամանակ ոստիկանների կողմից ծեծի է ենթարկվել». այս մասին հաղորդագրություն է տարածել Human Rights Watch միջազգային իրավապաշտպան կազմակերպությունը:
Խոսքը Ավան և Նոր Նորք վարչական շրջանների ընդհանուր իրավասության դատարանում ՊՊԾ գնդի զինված զավթման մեջ մեղադրվող «Սասնա ծռեր» խմբի կալանավորված անդամների և ոստիկանության աշխատակիցների միջև տեղի ունեցած միջադեպի մասին է:
«Իշխանությունները պարտավոր են շտապ, մանրակրկիտ և արդյունավետ քննություն իրականացնել ծեծի մասին պնդումների վերաբերյալ և պատասխանատվության ենթարկել մեղավորներին», – ասված է HRW հաղորդագրության մեջ:
«Մեղադրյալների դեմքերին, գլխին, որովայնին, մեջքին և ոտքերի վրա հարվածների հետքեր և վերքեր են հայտնաբերվել, որոնք ենթադրաբար հունիսի 28-ին դատարանի շենքում տեղի ունեցած միջադեպի հետևանք են»,- իր հայտարարության մեջ նշել է իրավապաշտպան կազմակերպությունը:
«Կալանավորված անձանց նկատմամբ վատ վերաբերմունքը արգելված է ցանկացած պարագայում: Ներկայացված մեղադրանքի հետ կապված զայրույթի որևէ չափաբաժին կամ դատական նիստի լարվածության աստիճան չեն կարող արդարացնել պաշտպանյալների նկատմամբ ֆիզիկական բռնության գործադրումը», – հայտարարել է Հարավային Կովկասի հարցերով Human Rights Watch կազմակերպության տնօրեն Գիորգի Գոգիան:
«Իշխանությունները հստակ պարտավորություն ունեն անմիջապես և մանրակրկիտ հետաքննություն անցկացնել և պատասխանատվության ենթարկել մեղավորներին»,- Նշել է կազմակերպության տնօրենը:
