Վանում բողոքի ցույցերի ժամանակ ոստիկանները հարձակվել են քաղաքական գործիչների և ցուցարարների վրա․ ՏԵՍԱՆՅՈՒԹ

Թուրքիայի քրդամետ «Ժողովուրդների հավասարություն և ժողովրդավարություն» կուսակցությունն (DEM) ապրիլի 3-ին Վան նահանգում Կենտրոնական գործադիր կոմիտեի (MYK) նիստ է անցկացրել այն բանից հետո, երբ տեղական ընտրական հանձնաժողովը որոշում է կայացրել չեղարկել Վանի քաղաքապետի թեկնածու Աբդուլլահ Զեյդանի հաղթանակը և այն շնորհել իշխող «Արդարություն և զարգացում» կուսակցությանը, գրում են տեղական լրատվամիջոցները։

Նշվում է, որ հանդիպմանը մասնակցել են DEM կուսակցության համանախագահներ Թուլայ Հաթիմողուլլարը և Թունջեր Բաքըրհանը, MYK-ի անդամներ, Բաշաք Դեմիրթաշը՝ բանտարկված քուրդ քաղաքական գործիչ Սելահաթթին Դեմիրթաշի կինը և այլք։ Նրանք ողջունել են քաղաք ժամանած ընդդիմադիր Ժողովրդահանրապետական կուսակցության (CHP) պատվիրակությանը։

Ոստիկանները հարձակվել են շենքի մուտքի մոտ սպասող մարդկանց վրա, որտեղ անցկացվում էր MYK-ի նիստը։

Պատվիրակությանը, այդ թվում՝ պատգամավորներին, թույլ չեն տվել դուրս գալ շենքից, որի բոլոր ելքերը փակվել են ոստիկանների կողմից։ Լրագրողների աշխատանքը ևս խոչընդոտվել է։ Պատվիրակությունը ցանկացել է երթով շարժվել դեպի Ֆեքիյե Թեյրան այգի՝ մամուլի հայտարարություն տարածելու համար, սակայն ոստիկանությունը թույլ չի տվել դա անել՝ պատճառաբանելով նահագապետարանի կողմից սահմանված բողոքի ակցիաների 15-օրյա արգելքը։

Ոստիկանությունը հարձակվել է նաև Թուրքիայի ձախ ընդդիմադիր Աշխատավորական կուսակցության նախագահ և պատգամավոր Էրքան Բաշի վրա։

Երբ պատվիրակությանը թույլ չեն տվել երթ անցկացնել, այգում հավաքված բազմությունը շարժվել է դեպի շենք։ Շենքին մոտենալուն պես ոստիկանների միջամտությունը վերսկսվել է։ Գազային ռումբերով հարձակման ենթարկվելուց հետո պատվիրակությունը վերադարձել է շենք, որի մուտքը փակել են ոստիկանները։

Բոլոր քուրդ քաղաքական գործիչներն ընդգծել են, որ իրենք չեն լքի Վանը, քանի դեռ ընտրված քաղաքապետին չի տրվել քաղաքապետի վկայականը:

Հիշեցնենք, որ բողոքի ցույցերը սկսվել են նախօրեից։ Վանի նահանգային ընտրական խորհուրդը իշխող «Արդարություն և զարգացում» կուսակցության թեկնածուին է տվել  քաղաքապետի պաշտոնը՝ չնայած քաղաքապետի ընտրություններում քրդամետ «Ժողովուրդների հավասարություն և ժողովրդավարություն» (DEM) կուսակցության համոզիչ հաղթանակին։ Ընտրական հանձնաժողովը որոշել է «ընտրությունների վկայականը» (փաստաթուղթ, որը հաստատում է ընտրված թեկնածուի կառավարման իրավունքը) տալ ԱԶԿ անդամ Աբդուլահաթ Արվասին, որը նահանգում ստացել է ձայների միայն 27,15 տոկոսը։ Որոշվել է չեղյալ համարել DEM կուսակցության թեկնածու Աբդուլլահ Զեյդանի ընտրվելու իրավունքը՝ համաձայն Արդարադատության նախարարության վերջին դիմումի։ Նա հաղթել է Վանի ընտրություններում ձայների ճնշող մեծամասնությամբ՝ 55,48 տոկոսով։

Այս որոշման պատճառով Վանում բողոքի ակցիաները չեն դադրում, որոնք գիշերը տարածվել են քրդաբնակ այլ քաղաքներում, նաև բախումներ են գրանցվել։ Ոստիկանությունը միջամտել է բողոքի ակցիաներին։ Ներքին գործերի նախարար Ալի Երլիքայան հայտարարել էր, որ Վանում, Հաքարիում, Սիրթում, Բաթմանում, Շըրնաքում և Իզմիրում 89 մարդ է բերման ենթարկվել։

Էմմա Չոբանյան