14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Ովքեր են մինչ այս պահը շնորհավորել Վլադիմիր Պուտինին
Քաղաքականություն
18.03.2024 | 14:30
Ռուսաստանի նախագահ Վլադիմիր Պուտինը հեռախոսազրույց է ունեցել Ադրբեջանի, Բելառուսի, Ղազախստանի, Ղրղզստանի, Տաջիկստանի և Ուզբեկստանի ղեկավարների հետ։ Վերջինները շնորհավորել են նրան ընտրություններում տարած հաղթանակի կապակցությամբ, մարտի 18-ին հայտնել է Կրեմլի մամուլի ծառայությունը։
Կրեմլի տարածած հայտարարության մեջ նշվում է, որ «երկրների ղեկավարները ջերմորեն շնորհավորել են Վլադիմիր Պուտինին նախագահական ընտրություններում համոզիչ հաղթանակի կապակցությամբ՝ հատկապես նշելով քաղաքացիների լայն աջակցությունը ներքին և արտաքին քաղաքականության հարցում նրա բռնած ուղուն և քվեարկության ընթացքում ընտրողների բարձր մասնակցությունը, նաև մաղթել հետագա հաջողություններ կառավարության գործունեության մեջ»։
Տեղեկացվում է նաև, որ անդրադարձ է եղել երկկողմ հարաբերությունների զարգացման արդի խնդիրներին և միջազգային օրակարգի որոշ առանցքային թեմաների։
Ավելի վաղ հաղորդվել էր, որ Հյուսիսային Կորեայի, Ուզբեկստանի, Տաջիկստանի, Նիկարագուայի և Վենեսուելայի առաջնորդները շնորհավորել են Պուտինին։
Հիշեցնենք՝ ԱՄՆ Պետքարտուղարությունը դատապարտել է Ռուսաստանի կողմից օկուպացված ուկրաինական տարածքներում կեղծ ընտրությունների անցկացումը և ընդգծել, որ Միացյալ Նահանգները երբեք չի ճանաչի դրանց արդյունքները։ ԵՄ-ի և ՆԱՏՕ-ի պաշտոնյաները նույնպես թերահավատություն են հայտնել Ռուսաստանի Դաշնությունում նախագահական ընտրությունների վերաբերյալ։ Այսպես, եվրոպական դիվանագիտության ղեկավար Ժոզեպ Բորելի ներկայացուցիչն ասել է, որ ժամանակակից Ռուսաստանում դժվար է պատկերացնել արդար և ժողովրդավարական քվեարկություն։
ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ այս ընտրությունները չեն կարող լինել ազատ և արդար։
«Ռուսաստանում ընտրություններն ազատ և արդար չեն լինելու։ Մենք գիտենք, որ ընդդիմադիր քաղաքական գործիչների մի մասն անազատության մեջ է, մյուսները սպանվել են, շատերը՝ աքսորում»,- ասել է նա:
Հիշեցնենք նաև, որ ընտրություններին մասնակցում էր չորս թեկնածու․ բացի գործող նախագահ Վլադիմիր Պուտինից՝ իրենց թեկնածություններն են առաջադրել Լեոնիդ Սլուցկին՝ Լիբերալ-դեմոկրատական կուսակցությունից, Նիկոլայ Խարիտոնովը՝ ՌԴ Կոմունիստական կուսակցությունից, Վլադիսլավ Դավանկովը՝ «Նոր մարդիկ» կուսակցությունից։ Կենտրոնական ընտրական հանձնաժողովը որևէ անկախ ընդդիմադրի կամ հակապատերազմական հայացքներ ունեցող թեկնածուի չի գրանցել։
