12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Հյուսիսային Կորեայի, Ուզբեկստանի, Տաջիկստանի, Նիկարագուայի և Վենեսուելայի առաջնորդները շնորհավորել են Պուտինին
Քաղաքականություն
18.03.2024 | 12:33
Մի շարք երկրների ղեկավարներ շնորհավորել են Վլադիմիր Պուտինին Ռուսաստանի նախագահի պաշտոնում հինգերորդ անգամ վերընտրվելու կապակցությամբ։ Մասնավորապես, Հյուսիսային Կորեայի առաջնորդ Կիմ Չեն Ընը Վլադիմիր Պուտինին շնորհավորական հեռագիր է հղել։ Տեքստը, սակայն, չի հրապարակվում, գրում է Meduza-ն։
Ուզբեկստանի նախագահ Շավքաթ Միրզիյոևը շնորհավորել է Պուտինին «համոզիչ հաղթանակի կապակցությամբ»։
«Մեր պետության ղեկավարի ուղերձում նշվում է, որ ընտրողների բարձր մասնակցությունը և քվեարկության արդյունքները ևս մեկ անգամ ակնհայտորեն ցույց տվեցին բնակչության անվերապահ վստահությունն ու ամուր աջակցությունը Վլադիմիր Պուտինի քաղաքական կուրսին և սոցիալ-տնտեսական բարեփոխումների ծրագրին»,- Ուզբեկստանի նախագահի մամուլի քարտուղար Շերզոդ Ասադովի հայտարարությունն է մեջբերում «Ինտերֆաքսը»։
Տաջիկստանի նախագահ Էմոմալի Ռահմոնի կողմից Պուտինին ուղղված շնորհավորական հեռագրում ասվում է, որ քվեարկության արդյունքները «հերթական վառ ապացույցն են բարձր քաղաքական հեղինակության և ռուսական հասարակության կողմից երկրի կայուն սոցիալ-տնտեսական զարգացման ապահովման ու նրա միջազգային դիրքերի ամրապնդման պետական ուղու նկատմամբ ունեցած լայն աջակցության»։
Նիկարագուայի առաջնորդ Դանիել Օրտեգան նույնպես շնորհավորել է Պուտինին՝ նրան անվանելով «հարգելի ընկեր, եղբայր և վերընտրված նախագահ» ու նշելով, որ ընտրություններում նրա հաղթանակը համարում է «մարդկության համար անհրաժեշտ կայունության ներդրում»։
Վենեսուելայի նախագահ Նիկոլաս Մադուրոն շնորհավորական գրառում է արել X սոցցանցում՝ մասնավորապես, նշելով.
«Մենք գրկում ենք ողջ ռուս ժողովրդին և «Եդինայա Ռոսիա» կուսակցությանը»։
Հիշեցնենք՝ ԱՄՆ Պետքարտուղարությունը դատապարտել է Ռուսաստանի կողմից օկուպացված ուկրաինական տարածքներում կեղծ ընտրությունների անցկացումը և ընդգծել, որ Միացյալ Նահանգները երբեք չի ճանաչի դրանց արդյունքները։
ԵՄ-ի և ՆԱՏՕ-ի պաշտոնյաները նույնպես թերահավատություն են հայտնել Ռուսաստանի Դաշնությունում նախագահական ընտրությունների վերաբերյալ։ Այսպես, եվրոպական դիվանագիտության ղեկավար Ժոզեպ Բորելի ներկայացուցիչն ասել է, որ ժամանակակից Ռուսաստանում դժվար է պատկերացնել արդար և ժողովրդավարական քվեարկություն։
ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ այս ընտրությունները չեն կարող լինել ազատ և արդար։
«Ռուսաստանում ընտրություններն ազատ և արդար չեն լինելու։ Մենք գիտենք, որ ընդդիմադիր քաղաքական գործիչների մի մասն անազատության մեջ է, մյուսները սպանվել են, շատերը՝ աքսորում»,- ասել է նա:
Հիշեցնենք, որ ընտրություններին մասնակցում էր չորս թեկնածու․ բացի գործող նախագահ Վլադիմիր Պուտինից՝ իրենց թեկնածություններն են առաջադրել Լեոնիդ Սլուցկին՝ Լիբերալ-դեմոկրատական կուսակցությունից, Նիկոլայ Խարիտոնովը՝ ՌԴ Կոմունիստական կուսակցությունից, Վլադիսլավ Դավանկովը՝ «Նոր մարդիկ» կուսակցությունից։
Կենտրոնական ընտրական հանձնաժողովը որևէ անկախ ընդդիմադրի կամ հակապատերազմական հայացքներ ունեցող թեկնածուի չի գրանցել։
