Քաղաքականություն
09.03.2024 | 21:31
Հայաստանի հատուկ հանձնարարություններով արդեն նախկին դեսպան Էդմոն Մարուքյանն ուղիղ եթերում խոսել է պաշտոնից հրաժարական տալու պատճառների մասին։ Նրա խոսքով՝ հատուկ հանձնարարություններով դեսպան լինելու առաջարկը ստացել է այն ժամանակ, երբ եռում էր ռուս-ուկրաինական պատերազմն ու սկսվել էր հայ-ադրբեջանական բանակցային գործընթացը։
«Այդ ժամանակ գոյություն ունեին Հայաստանի Հանրապետության կողմից գծված կարմիր գծեր․ Լեռնային Ղարաբաղի ժողովրդի իրավունքների և անվտանգության միջազգային մեխանիզմի ներքո երաշխավորումը, այսինքն՝ ՀՀ-ն և Ադրբեջանը ճանաչում են միմյանց։ Հայաստանը չի պահանջում Լեռնային Ղարաբաղի անկախությունը՝ փոխարենը միջազգային իրավունքի ներքո ստանում է հայերի անվտանգության երաշխավորությունը։ Այս մասին հայտարարությունը հնչում է Պրահայում՝ փաթեթի համաձայն, սակայն վերոնշյալ հայտարարությունից որոշ ժամանակ հետո Ադրբեջանը չի հայտարարում ՀՀ տարածքային ամբողջականությունը ճանաչելու մասին», –մանրամասնել է Մարուքյանը։
Փաշինյանի հետ Մարուքյանի վերջին անհամաձայնությունը եղել է Սահմանդրության փոփոխման շուրջ։ «Ես դեմ եմ պետականության հիմքերը վերանայելուն: Իմ բանակցային ստրատեգիան տոտալ այլ է։ Բարոյական չէր լինի իմ կողմից, չկիսելով «հետկարմիրգծերի փլուզման ժամանակաշրջանում ձևավորված մոտեցումները, շարունակել մնալ այդ պաշտոնին»,- մանրամասնել է Մարուքյանը։
Անդրադառնալով իր հրաժարականի հետ կապված լուրերին, թե պաշտոնից հեռացել է, որ մասնակցի արտահերթ խորհրդարանական ընտրություններին, Մարուքյանը հայտարարել է, որ ոչ արտահերթ ընտրություններ են սպասվում, ոչ էլ սահմանադրական հանրաքվե: «Տխմարագույն հեքիաթ է, թե ես լքել եմ խորտակվող նավը: Իշխանական նավը չի խորտակվում: Երևանի ավագանու ընտրությունները ցույց են տվել, որ իշխանությունների գործերը վատ չեն ու խորտակվող նավ չկա»,- պարզաբանել է նա:
Ավելի վաղ նա տեղեկացրել էր, որ վերջին շրջանում մի շարք արտաքին քաղաքական հիմնարար հարցերի շուրջ իր և Փաշինյանի տեսլականների տարբերություններն անհնարին են դարձնում իր հետագա ներգրավվածությունը արտաքին քաղաքական ճակատում:
