25.06.2026 | 11:02
ՀՅԴ ՀԵՄ-ը պնդում է՝ Արցախի դրոշը վերականգնելու փորձի ժամանակ երկու անդամ բերման է ենթարկվել
36 միլիոն դրամ՝ Բանակի օրվա միջոցառման համար
29.02.2024 | 17:00
Բանակի կազմավորման 32-րդ տարեդարձի առթիվ Կարեն Դեմիրճյանի անվան մարզահամերգային համալիրում հունվարի 28-ին տեղի ունեցավ տոնական միջացառում։ Ներկա էին Նիկոլ Փաշինյանը, Ալեն Սիմոնյանը, Վահագն Խաչատուրյանը, օրենսդիր, գործադիր, դատական իշխանության ներկայացուցիչներ, ՀՀ բարձրագույն սպայակազմը, ՀՀ-ում հավատարմագրված դեսպաններ, զինծառայողներ, գիտության, արվեստի, մշակույթի, սպորտի ներկայացուցիչներ:
Միջոցառման կազմակերպիչ Պաշտպանության նախարարությունը Factor.am-ի գրավոր հարցմանն ի պատասխան հայտնել է, որ այդ միջոցառման համար հարկատուների գրպանից ծախսվել է 36.291.366 ՀՀ դրամ։ Տոնական միջոցառմանը ներկա է եղել 2030 անձ։
«Ծախսը ներառել է Կ․ Դեմիրճյանի անվան մարզահամերգային համալիրի համերգային դահլիճի, ճեմասրահի, այլ տարածքների վարձակալություն, 12 տարբեր չափսերի ցուցապաստառների տպագրություն և տեղադրում, հրավիրատոմսերի, ծրարների, կրծքանշանների տպագրություն, ինչպես նաև համերգային մասի ապահովում՝ LED էկրան բեմի հատվածում, ձայնային և լուսային սարքավորումներ, հաղորդավարներ, մենակատարներ, ռեժիսոր և ռեժիսորի օգնական, Հայաստանի պետական ֆիլհարմոնիկ նվագախումբ, Հայաստանի պետական ակադեմիական երգչախումբ, հյուրասիրություն, երգերի գործիքավորում, հյուրընկալների ծառայություն և այլն»,- նշված է ՊՆ գրավոր պատասխանում։
Ի դեպ, այս տեղեկատվության տրամադրման համար Պաշտպանության նախարարությանը 30 օր ժամանակ է անհրաժեշտ եղել։
Միջոցառումը վարել են Գոհար Գասպարյանն ու Արման Մարգարյանը։ Թե որքան են վարձատրվել հաղորդավարները, ՊՆ-ից չեն հայտնել։ Մեր հարցմանն ի պատասխան նշել են, որ նրանց հետ պայմանագիրը կնքել է «Կարեն Դեմիրճյանի անվան մարզահամերգային համալիր» ՓԲԸ-ն։
Արփի Հակոբյան
