12.08.2026 | 12:41
Ալիևը հայտարարել է, թե Նախիջևանի հետ ցամաքային կապն Ադրբեջանի «վաղեմի երազանքն» է
Վրաստանի խորհրդարանն Ադրբեջանի լիազորությունների կասեցման հարցով դիմել է ԵԽԽՎ-ին
Քաղաքականություն
21.02.2024 | 14:51
Եվրոպայի խորհրդի Խորհրդարանական վեհաժողովում Վրաստանի խորհրդարանի պատվիրակության ղեկավար Գիվի Միկանաձեն նամակ է հղել ԵԽԽՎ նախագահ Թեոդորոս Ռուսոպուլոսին՝ Ադրբեջանի պատվիրակության լիազորությունները մեկ տարով կասեցնելու որոշման առնչությամբ։ Այս մասին հայտնում է Ադրբեջանի Միլլի Մեջլիսը, որին վկայակոչում են ադրբեջանական լրատվամիջոցները։
Նամակում նշվում է, որ «նման կոշտ որոշումներն ընդունվում են՝ առանց քննարկելու ԵԽԽՎ-ի հետագա հարաբերությունների համար Ադրբեջանի և, ընդհանրապես, Հարավային Կովկասի հետ հնարավոր բացասական հետևանքները»։ Ըստ վրացական պատվիրակության ղեկավարի՝ նման բանաձևն անհնարին է դարձնում ԵԽԽՎ-ի շրջանակներում ապագայում Ադրբեջանի հետ համագործակցությունն ու կարծիքների փոխանակումը։ Բացի այդ, ըստ նրա, «որոշումը վնասում է նաև Եվրոպայի խորհրդի՝ որպես երկխոսության և համագործակցության կարևոր հարթակի հեղինակությանը»։
Միկանաձեն կոչ է անում վերանայել որոշումը՝ նշելով, որ այս բանաձևի չեղարկումը կծառայի Եվրոպայի խորհրդի շահերին։
Ավելի վաղ Թուրքիայի ԱԳՆ-ն էր հայտարարություն տարածել Ադրբեջանի լիազորությունների դադարեցման հետ կապված՝ կոչ անելով «հնարավորինս արագ ուղղել այդ սխալը և կենտրոնանալ Հարավային Կովկասում խաղաղության հաստատման ջանքերի ուղղությամբ»։
Հիշեցնենք՝ հունվարի 24-ին ԵԽԽՎ-ն քվեարկությամբ որոշել է չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ՝ իր կանոնակարգային պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ է քվեարկել 76, դեմ՝ 10 պատգամավոր, ևս 4 խորհրդարանական ձեռնպահ է մնացել։ Դեմ են քվեարկել Թուրքիայի պատվիրակությունից 9 պատգամավոր, ևս մեկ պատգամավոր՝ Ալբանիայից։ Վրացական պատվիրակությունը քվեարկությանը չէր մասնակցել։
