07.10.2026 | 15:00
Հայտարարվել են քիմիայի ոլորտում Նոբելյան մրցանակի դափնեկիրները
Միջազգային հանրության արձագանքը Նավալնիի մահվան լուրին
Քաղաքականություն
16.02.2024 | 20:21
Ռուս ընդդիմադիր գործիչ Ալեքսեյ Նավալնիի՝ բանտարկության մեջ մահվան մասին լուրը ցնցել է աշխարհը։ Օտարերկրյա քաղաքական գործիչներն արձագանքում են այս լուրին, որոնք ստորև ներկայացնում ենք ձեր ուշադրությանը։
ԵԽԽՎ նախագահ Թեոդորոս Ռուսոպուլոս․
«Ոչ մի կասկած չկա, որ նրան ապօրինի բանտարկության և համակարգված կերպով սարսափելի ու անմարդկային վերաբերմունքի արժանացրած ՌԴ պետությունն է կրում ամբողջ պատասխանատվությունը նրա մահվան համար։ Սա գումարվում է այն բոլոր հանցագործություններին, որոնք արդեն իրականացրել է ՌԴ ռեժիմը։ Նավալնիի մահը մեծ կորուստ է ռուս ժողովրդի համար։ Որպես իր իրավունքների խիզախ և վճռական պաշտպան՝ նա ցույց տվեց, որ ճշմարտության ուժը կարող է մարտահրավեր նետել նույնիսկ ամենահզոր բռնապետություններին: Նա հույսի փարոս էր Ռուսաստանում ազատության համար պայքարողների համար»։
Շվեդիայի արտաքին գործերի նախարար Տոբիաս Բիլստրյոմ.
«Սարսափելի նորություններ Ալեքսեյ Նավալնիի մասին։ Եթե ռուսական բանտում նրա մահվան մասին հաղորդագրությունը համապատասխանում է իրականությանը, ապա այն ներկայացնում է Պուտինի ռեժիմի հերթական սարսափելի հանցագործությունը: Նավալնիի հանդեպ անողոքությունը ևս մեկ անգամ ցույց է տալիս, թե ինչու է անհրաժեշտ շարունակել ավտորիտարիզմի դեմ պայքարը»։
Չեխիայի արտաքին գործերի նախարար Յան Լիպավսկի.
«Ինչպես Ռուսաստանը վերաբերվում է իր արտաքին քաղաքականությանը, այնպես էլ վերաբերվում է իր քաղաքացիներին: Այն դարձել է դաժան պետություն, որը սպանում է մարդկանց, ովքեր երազում են ավելի լավ ապագայի մասին, ինչպիսիք են Նեմցովը կամ այժմ՝ Նավալնին, որոնք բանտարկվել և տանջամահ են արվել Պուտինի դեմ կանգնելու համար»:
Նիդերլանդների վարչապետ Մարկ Ռյուտե.
«Նավալնիի մահը ցույց է տալիս ռուսական ռեժիմի աննախադեպ դաժանությունը։ Նավալնին պայքարում էր հանուն ժողովրդավարական արժեքների և կոռուպցիայի դեմ։ Իր պայքարի համար նա պետք է վճարեր իր կյանքով, մինչ նրան պահում էին ամենադաժան ու անմարդկային պայմաններում։ Ուժ եմ մաղթում նրա ընտանիքին, սիրելիներին և բոլոր նրանց, ովքեր նրա հետ պայքարել են Ռուսաստանում փոփոխությունների համար»:
