13.01.2026 | 11:29
«Նոան» հրաժեշտ է տվել Օգնյեն Չանչարևիչին․ ՏԵՍԱՆՅՈՒԹ
50 միավոր տեխնիկա՝ 1 հատը 692 հազար դրամով․ որքանով է արդյունավետ եղել ձնամաքրիչների գնումը․ ՏԵՍԱՆՅՈՒԹ
Հասարակություն
02.02.2024 | 18:32
Երևանի քաղաքապետարանը 2023 թվականին ձեռք է բերել 50 միավոր մայթ մաքրող տեխնիկա: Քաղաքապետարանն այս գնումն իրականացրել է «Մնացական Պողոսյան ԱՁ»-ից՝ յուրաքանչյուր միավորի համար վճարելով 692 հազար ՀՀ դրամ, այսինքն՝ 50 միավոր գնելու համար քաղաքային բյուջեից հատկացվել է 34 մլն 600 հազար ՀՀ դրամ։
Տեխնիկական բնութագրում սարքի ֆիրման նշված է VOTE, մակնիշը՝ QCA-165։ Votemachinery.com կայքում և համացանցում առհասարակ նշված մակնիշի ձնամաքրող սարք մեզ չհաջողվեց գտնել։
Վերջին օրերին, երբ մայրաքաղաքում առատ ձյուն էր տեղում, քաղաքացիները դժգոհում էին ձնամաքրման աշխատանքներից, չմաքրված փողոցների ու մայթերի լուսանկարներ հրապարակում։ Նշում էին, որ մայթերին չեն տեսել նոր տեխնիկան, փոխարենը դրանք նկատել են փողոցի երթևեկելի մասերում։
Քաղաքացիների դժգոհությունից ու քննադատությունից հետո քաղաքապետարանը և վարչական շրջանների ղեկավարները, նաև համայնքային այլ աշխատողներ սկսեցին լուսանկարներ տարածել՝ ցույց տալով, որ տեխնիկան օգտագործում են մայթերի ձյունը մաքրելու համար։ Քաղաքապետարանից հայտարարեցին, որ ձնամաքրման աշխատանքներում ներգրավված են ԵԱՍՄ հիմնարկն ու «Կանաչապատում և շրջակա միջավայրի պահպանություն» ՀՈԱԿ-ը, ընդհանուր առմամբ, աշխատել է 134 մասնագիտացված բազմաֆունկցիոնալ տեխնիկա՝ 106 միավոր ԵԱՍՄ հիմնարկից, 28 միավոր էլ՝ «Կանաչապատում և շրջակա միջավայրի պահպանություն» ՀՈԱԿ-ից։
Քաղաքապետի խորհրդական Կամո Արեյանը, սակայն, գործակարգավարական վերջին նիստի ժամանակ հայտնեց, որ վարչական շրջանների ղեկավարներն էլ մասնավոր ընկերություններից են իրենց նախաձեռնությամբ տեխնիկա ներգրավել։ Սա այն դեպքում, երբ 2023-ի դեկտեմբերին քաղաքային իշխանությունը հայտարարում էր, թե ունեցած տեխնիկան բավարար է, իսկ հաշվարկում առկա է 38 վերապրոֆիլավորված աղ ցանող մեքենա։
Առատ տեղումները ցույց տվեցին, որ քաղաքային իշխանություններն այնքան էլ պատրաստ չեն ձմռանը։ Որոշ հատվածներում երթևեկությունը կաթվածահար էր եղել, անգամ համայնքային ավտոբուսներ էին վթարվել, որոշները մնացել էին ճանապարհին։ Քաղաքապետ Ավինյանն էլ գործակարգավարական վերջին նիստին հայտարարեց, թե ամենաշատ ձյունը տեղացել է ֆեյսբուքում։
Նա, այնուամենայնիվ, խոստովանեց՝ ձնամաքրման աշխատանքներում թերացել են, բայց ևս մեկ անգամ պնդեց, որ տեխնիկայի պակաս չեն ունեցել։
ԵԱՍՄ հիմնարկի տնօրեն Բագրատ Աղաջանյանը հունվարի 26-ին ազատվել էր աշխատանքից։ Ավինյանը, Factor TV-ի հարցին ի պատասխան, ասել է, որ այդ որոշումն ավելի վաղ է կայացրել և ուղիղ կապ չունի ձնամաքրման աշխատանքների հետ։ Այդ պաշտոնում նշանակվել է Ավինյանի նախկին խորհրդական, Դավթաշեն և Մալաթիա-Սեբաստիա վարչական շրջանների նախկին ղեկավար Սաշա Կատվալյանը։
Մանրամասները՝ տեսանյութում։
Արփի Հակոբյան
