01.11.2024 | 23:19
Հրդեհ Գյումրու տներից մեկում
Բլինքենը նախազգուշացրել է, որ Մերձավոր Արևելքում 1973 թվականից ի վեր ամենավտանգավոր իրավիճակն է
Քաղաքականություն
30.01.2024 | 19:15
ԱՄՆ պետքարտուղար Էնթոնի Բլինքենը նախազգուշացրել է, որ Մերձավոր Արևելքը 1973 թվականից ի վեր բախվում է առնվազն «ամենավտանգավոր պայմաններին», քանի որ Վաշինգտոնն էլ դիտարկում է անցած շաբաթավերջին երեք զինծառայողների սպանությանն իր պատասխանը, գրում է The Financial Times-ը։
Լրատվամիջոցը նշում է, որ Բլինքենի մեկնաբանություններն ընդգծում են նախագահ Բայդենի վարչակազմի մտահոգությունը հակամարտության ընդլայնման հնարավորության վերաբերյալ, նույնիսկ այն դեպքում, երբ նա խոստանում է վրեժխնդիր լինել Իրանի կողմից աջակցվող աշխարհազորայիններից, որոնց մեղադրում է մահացու հարվածի համար:
Ամերիկացի պաշտոնյան հայտնել է, որ ԱՄՆ զինվորականներն անցած կիրակի չեն կարողացել կանգնեցնել թշնամու անօդաչու թռչող սարքը, երբ այն շփոթել են ամերիկյան ԱԹՍ-ի հետ, որը միաժամանակ մոտեցել է Սիրիայի հետ Հորդանանի սահմանին մոտ գտնվող բազային։ Այս հարձակումն առաջինն էր, որը սպանել է ամերիկյան զինվորների այն բանից հետո, երբ հոկտեմբերի 7-ին սկսվել է Իսրայելի և ՀԱՄԱՍ-ի միջև պատերազմը։
«Սա անհավանական անկայուն ժամանակաշրջան է Մերձավոր Արևելքում։ Ես կասեի՝ առնվազն 1973 թվականից ի վեր, և գուցե նույնիսկ ավելի վաղ մենք չենք տեսել այնպիսի վտանգավոր իրավիճակ, ինչպիսին այժմ բախվում ենք տարածաշրջանում»,- ասել է Բլինքենը լրագրողներին ՆԱՏՕ-ի գլխավոր քարտուղար Յենս Ստոլտենբերգի հետ մամուլի ասուլիսի ժամանակ։
Նա նշել է, որ Վաշինգտոնը պատասխանելու է ԱՄՆ զինվորների դեմ հարձակմանը։
«Մենք կպատասխանենք։ Եվ այդ արձագանքը կարող է լինել բազմաշերտ, աստիճանական և ժամանակի ընթացքում կայուն»,-ասել է Բլինքենը։
Պետքարտուղարը նաև ընդգծել է, որ ԱՄՆ-ն ցանկանում է «կանխել ավելի լայն էսկալացիան»:
Հիշեցնենք, որ ըստ Sky News-ի՝ նախագահ Ջո Բայդենը կարող է մոտակա ժամերին Մերձավոր Արևելքում ԱՄՆ ռազմական գործողությունների թույլտվություն տալ։ Նշվում է, որ Պենտագոնը Բայդենին գործողության մի քանի տարբերակ կառաջարկի, սակայն հետևանքներն անորոշ են և կարող են ավելի լայնածավալ պատերազմի վերածվել։
Էմմա Չոբանյան
