Ադրբեջանի ԱԳՆ-ն չի ընդունում Նիկոլ Փաշինյանի առաջարկները և անհանգստացած է ՀՀ-ի կողմից սպառազինության ձեռքբերման կապակցությամբ․ հայտարարություն

Հայաստանի վարչապետ Նիկոլ Փաշինյանի հայտարարությունը միտված է Ադրբեջանի և Հայաստանի միջև խաղաղության հաստատման և միջպետական հարաբերությունների մասին երկկողմ համաձա յնագրի նախագծի մշակման գործընթացից ուշադրությունը շեղելուն։ Նման հայտարարություն է արել Ադրբեջանի ԱԳՆ խոսնակ Այխան Հաջիզադեն։

Նա նշել է, թե հայկական կողմը, իբր, Սահմանադրության մեջ, օրենսդիր մարմնի մի շարք որոշումներում, ինչպես նաև միջազգային տարբեր դատարաններ իր դիմումներում, միջազգային կազմակերպությունների շրջանակում տարածված նամակներում շարունակում է պահանջներ ներկայացնել Ադրբեջանի տարածքային ամբողջականության և ինքնիշխանության դեմ։

«Չնայած դա դադարեցնելու կոչերին՝ Հայաստանի կողմից այս ուղղությամբ գործնական քայլեր չեն ձեռնարկվել։ Այս առումով այն, որ հայկական կողմն այս ուղղությամբ միջոցներ ձեռնարկելու փոխարեն անում է գործնական նշանակություն չունեցող առաջարկներ, թյուրիմացություն է առաջացնում և անընդունելի է։ Հաշվի առնելով վերը նշվածը, ինչպես նաև ՀՀ վարչապետի հայտարարությունը, որ իր երկիրը վարում է ռազմականացման լուրջ քաղաքականություն, վերջին տարիներին մի քանի միլիարդ դոլարի զենքի մատակարարման պայմանագրեր է կնքել և զարգացնում է ռազմական արդյունաբերությունը, Փաշինյանի այս հայտարարությունը քաղաքական մանիպուլյացիա է ե ցույց տալիս, որ Հայաստանը լուրջ չի վերաբերվում խաղաղության գործընթացին»,- հայտարարել է Հաջիզադեն։

Նա հավելել է, թե Ադրբեջանը, իբր, իր հերթին «կշարունակի ջանքերը խաղաղության ապահովման ուղղությամբ և Հայաստանից համարժեք քայլեր է ակնկալում ոչ միայն խոսքով»։

Հիշեցնենք՝ ՀՀ վարչապետ Նիկոլ Փաշինյանը հայտարարել էր, որ Երևանն առաջարկել է Բաքվին ստորագրել սպառազինությունների փոխադարձ վերահսկողության, ինչպես նաև չհարձակման պայմանագիր։

Էմմա Չոբանյան