18.03.2026 | 12:42
Բաղդադում ԱՄՆ դեսպանատունը հրթիռային և անօդաչու թռչող սարքերի հարձակման է ենթարկվել
Հորդանան-Սիրիա սահմանին ԱԹՍ հարձակումը ամերիկացի 3 զինծառայող կյանք է խլել
Քաղաքականություն
29.01.2024 | 11:50
Ամերիկացի զինվորականները հայտնել են, որ անօդաչու թռչող սարքի հարձակման հետևանքով ամերիկացի 3 զինծառայող է զոհվել Հորդանանում՝ Սիրիայի հետ սահմանի մոտ։ Ամերիկյան ԶԼՄ-ների տվյալներով՝ ավելի քան 30 զինվորական է տուժել, գրում է BBC-ի ռուսական ծառայությունը։
ԱՄՆ նախագահ Ջո Բայդենը հայտարարել է, որ հարվածը հասցվել է Իրանի կողմից աջակցվող զինված խմբավորումների կողմից։
«Մինչ մենք հավաքում ենք այս հարձակման մասին բոլոր փաստերը, գիտենք, որ այն իրականացվել է Սիրիայում և Իրաքում գործող արմատական զինված խմբավորումների կողմից, որոնց աջակցում է Իրանը», – ասել է ԱՄՆ նախագահը։
«Դուք կարող եք վստահ լինել, որ մենք պատասխանատվության կենթարկենք մեղավորներին, երբ և ինչպես մենք նպատակահարմար համարենք», – հայտարարել է Բայդենը։
Նա նաև ցավակցություն է հայտնել զոհվածների հարազատներին և մտերիմներին։
Սպանված և վիրավոր ամերիկացի զինվորների անունները դեռևս չեն հրապարակվում։ Պենտագոնի անանուն պաշտոնյաները Reuters-ին հայտնել են, որ վիրավոր զինծառայողների մի մասը տարհանվել է բազայից հետագա բուժման համար, իսկ մյուսներին զննում են տեղում:
