15.09.2026 | 16:49
ՀՀՇ-ի ծիլերից ծնվեց մեկը, որը իր խոսույթով չի տարբերվում թուրքերից․ Խաչատրյանը՝ Եղոյանին․ ՏԵՍԱՆՅՈՒԹ
Պուտինը ԱՄՆ-ին Ուկրաինայի հարցով բանակցությունների պատրաստակամության մասին ազդանշաններ է ուղարկել․ Bloomberg
Քաղաքականություն
26.01.2024 | 14:32
ՌԴ նախագահ Վլադիմիր Պուտինը ոչ պաշտոնական խողովակներով ԱՄՆ-ին ազդանշաններ է ուղարկում՝ Ուկրաինայում «ռազմական հատուկ գործողության» ավարտի բանակցություններին իր պատրաստակամության մասին։ Այս մասին գրում է Bloomberg-ը՝ հղում անելով Կրեմլին մոտ կանգնած աղբյուրներին, փոխանցում է Forbes.ru-ն։
Լրատվամիջոցի զրուցակիցներն ասել են, որ այդ ազդանշաններն ամերիկացի բարձրաստիճան պաշտոնյաներին փոխանցվել են դեկտեմբերին միջնորդների միջոցով, սակայն հրաժարվել են բացահայտել, թե կոնկրետ ով է հանդես եկել որպես միջնորդ։ Ըստ աղբյուրների՝ Պուտինը, հնարավոր է, պատրաստ է դիտարկել Ուկրաինայի չեզոք կարգավիճակի և ՆԱՏՕ չմտնելու պահանջներից հրաժարումը։ Փոխարենը նա ակնկալում է Ռուսաստանի նոր տարածքների ճանաչում։
ՌԴ նախագահի խոսնակ Դմիտրի Պեսկովը գործակալության հետ զրույցում ասել է, որ Ռուսաստանը «բաց է եղել, կա և կլինի Ուկրաինայի հարցով բանակցությունների համար»։
«Մենք վճռական ենք մեր նպատակներին հասնելու համար։ Եվ մենք կնախընտրեինք դա անել դիվանագիտական ճանապարհով։ Եթե ոչ, ապա ռազմական գործողությունը կշարունակվի այնքան ժամանակ, քանի դեռ չենք հասել մեր նպատակներին»,- ասել է նա։
Լրատվամիջոցի հետ զրուցած ամերիկացի պաշտոնյաներն էլ հայտարարել են, որ ոչինչ չգիտեն ազդանշանների մասին ու ենթադրություն հայտնել, որ խոսքը կարող է լինել «ռուսական կողմից փորձարկման մասին»։ Նրանք նաև նշել են, որ չեն տեսնում որևէ ազդանշան ռազմական գործողությունները դադարեցնելու ուղիներ որոնելու՝ Պուտինի պատրաստակամության մասին։
«Մենք տեղյակ չենք Ռուսաստանի դիրքորոշման նկարագրված փոփոխությունների մասին։ Ուկրաինան ինքն է որոշելու՝ երբ և ինչպես բանակցել Ռուսաստանի հետ»,- ասել է ԱՄՆ Ազգային անվտանգության խորհրդի խոսնակ Ադրիեն Ուոթսոնը։
ՌԴ ԱԳՆ պաշտոնական ներկայացուցիչ Մարիա Զախարովան էլ, մեկնաբանելով Bloomberg-ի հրապարակումը, ասել է, որ Ռուսաստանը երբեք չի հրաժարվել բանակցություններից, սակայն «Կիևի ռեժիմին արգելել են դրանք վարել Լոնդոնը և Վաշինգտոնը»։
Սա առաջին հրապարակումը չէ այն մասին, որ ՌԴ նախագահը խաղաղ բանակցությունների իր պատրաստակամության մասին որոշ ազդանշաններ է ուղարկում ԱՄՆ-ին։ Նախկինում նմանատիպ ազդանշանների մասին գրել էր The New York Times-ը`նշելով Պուտինի ոչ թե խաղաղության, այլ հակամարտությունը «սառեցնելու» պատրաստակամության մասին։
Էմմա Չոբանյան
