Էրդողանն ու Ռայիսին Անկարայում քննարկել են Հարավային Կովկասում զարգացումները

Իրանի նախագահ Էբրահիմ Ռայիսին Անկարա պաշտոնական այցի շրջանակներում նախօրեին հանդիպել է Թուրքիայի նախագահ Ռեջեփ Թայիփ Էրդողանին։ Թուրքիա-Իրան բարձր մակարդակի համագործակցության խորհրդի 8-րդ նիստից հետո, որը տեղի է ունեցել երկու երկրների պատվիրակությունների մասնակցությամբ համաձայնագրերի ստորագրման արարողություն։ Թուրքիայի և Իրանի միջև ստորագրվել է 10 համաձայնագիր։ Թուրքական լրատվամիջոցների հաղորդմամբ՝ երկու երկրների նախագահները նաև մամուլի ասուլիսով են հանդես եկել։

«Մենք կարծում ենք, որ մեր խորհրդի նիստի շրջանակներում ընդունած որոշումները կարևոր են մեր տարածաշրջանի կայունության համար։ Մենք քննարկել ենք իսրայելական հարձակումները հատկապես Գազայում և պաղեստինյան օկուպացված տարածքներում։ Մենք մտքեր փոխանակեցինք բազմաթիվ հարցերի շուրջ։ Մենք առաջընթաց ենք գրանցել 30 միլիարդ դոլարի առևտրաշրջանառության նպատակի առումով»,-ասել է Էրդողանը։

Թուրքիայի նախագահը նաև հայտարարել է, որ քննարկել են միջազգային օրակարգի մի շարք հարցեր, այդ թվում՝ Հարավային Կովկասում իրավիճակը։

«Իմ սիրելի եղբայր Ռայիսիի հետ քննարկել ենք Պաղեստինի, Սիրիայի, Իրաքի, Աֆղանստանի և Հարավային Կովկասի իրադարձությունները։ Պաղեստինի հարցը Թուրքիայի և Իրանի ուշադրության կենտրոնում է։ Մեր նախարարները շարունակում են  իրենց ջանքերը Գազայի մեր եղբայրների անվտանգությունն ու բարեկեցությունն ապահովելու համար»,-ասել է Էրդողանը։

Իրանական լրատվամիջոցների փոխանցմամբ էլ ՝ Ռայիսին նշել է․ «Մենք կարծում ենք, որ Թուրքիայի և տարածաշրջանի երկրների անվտանգությունը մեր անվտանգությունն է, և տարածաշրջանի ամենափոքր անապահովությունը համարվում է անապահովություն ողջ տարածաշրջանի համար»։