30.06.2026 | 10:26
Մոնակոյում բնակելի շենքում պայթյուն է որոտացել․ ուկրաինացի գործարար է վիրավորվել
Գերմանիայում աննախադեպ բողոքի ցույցեր են․ 1,4 միլիոն մարդ դուրս է եկել փողոցներ
Քաղաքականություն
22.01.2024 | 13:03
Հարյուր հազարավոր մարդիկ կիրակի դուրս են եկել Գերմանիայի տարբեր քաղաքների փողոցներ՝ բողոքելու երկրում ծայրահեղ աջակողմյան AfD կուսակցության գործունեության դեմ։ Սրանով ավարտվել է շուրջ մեկ շաբաթ տևած բողոքի ցույցերի շարքը, որոնց մասնակցել են աննախադեպ թվով ցուցարարներ:
Միայն ուրբաթից մինչև կիրակի առնվազն հարյուր բողոքի ակցիա է տեղի ունեցել։ Campact-ի և Fridays for Future-ի կազմակերպիչները հաշվարկել են, որ ավելի քան 1,4 միլիոն մարդ դուրս է եկել փողոց՝ ձգտելով «գերմանական հասարակության ազդանշանն ուղարկել AfD-ի և ծայրահեղ աջերի դեմ», գրում է VOA-ն:
Քաղաքական գործիչները, ինչպես նաև եկեղեցական առաջնորդները և Բունդեսլիգայի ֆուտբոլային մենեջերները կոչ են արել երկրի բնակչությանը ընդդիմանալ ծայրահեղ աջ կազմակերպություններին:
Կիրակի Մյունխենում ցուցարարների հոսքն այնքան մեծ է եղել, որ ակցիաների կազմակերպիչները ստիպված են եղել չեղարկել ծրագրված երթը և անվտանգության նկատառումներից ելնելով՝ մարդկանց խնդրել են ցրվել։ Տեղի ոստիկանության տվյալներով՝ բողոքի ցույցի է եկել մոտ 100 հազար մարդ, այսինքն՝ չորս անգամ ավելի, քան գրանցվել էր միջոցառման համար։ Կազմակերպիչների հաշվարկով՝ Քյոլնում բողոքի ակցիային միացել է 70 հազար մարդ, մինչդեռ Բրեմենում, տեղի ոստիկանությունը տվյալներով, 45 հազար մարդ է դուրս եկել քաղաքի կենտրոնում ցույցի:
Եվս 100,000 մարդ հավաքվել է կիրակի երեկոյան Բեռլինում բողոքի ցույցի՝ ըստ ոստիկանության տվյալների:
Ծայրահեղ աջ կուսակցության դեմ բողոքի ալիքը հարուցել է Correctiv հետաքննական պարբերականի կողմից հունվարի 10-ին հրապարակված զեկույցը։ Դրանում ասվում է, որ AfD-ի անդամները ծայրահեղական խմբավորումների ներկայացուցիչների հետ հանդիպման ժամանակ քննարկել են ներգաղթյալների և «չձուլված քաղաքացիների» վտարման հարցը:
Գերմանիայի կանցլեր Օլաֆ Շոլցը, որը հանգստյան օրերին միացել է ցույցին, հայտարարել է, որ ներգաղթյալներին և քաղաքացիներին արտաքսելու ցանկացած ծրագիր հավասարազոր է «հարձակում Գերմանիայի ժողովրդավարության և, իր հերթին, բոլորի վրա»:
Նա կոչ է արել բոլորին ոտքի կանգնել՝ «հանուն միասնության, հանուն հանդուրժողականության, հանուն ժողովրդավարական Գերմանիայի»։
Ներքին գործերի նախարար Նենսի Ֆեսերը հայտարարել է, որ ծայրահեղ աջերի հավաքը հիշեցնում է 1942 թվականի «Վանսեի հրեշավոր համաժողովը», որի ժամանակ նացիստները ծրագրել էին ոչնչացնել եվրոպացի հրեաներին։
