20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Փակել են սենյակի դուռն ու դանակով սպառնացել. ինչ են պատմել բռնության ենթարկված բժիշկները․ ՏԵՍԱՆՅՈՒԹ
Հասարակություն
16.01.2024 | 21:01
Անցած գիշեր հերթական կանչով ժամանած շտապօգնության բժիշկները հայտնվել են պատանդի կարգավիճակում․ ահազանգած ընտանիքի անդամները բժիշկներին փակել են բնակարանի սենյակներից մեկում, դանակով սպառնացել, որ ամեն գնով պետք է փրկեն իրենց մոր կյանքը:
Բրիգադի անդամներից մեկին հաջողվել է համոզել կնոջ երկու որդիներին, որպեսզի դուրս գա սենյակից՝ մեքենայում եղած հատուկ բժշկական սարքավորումը վերև բարձրացնելու պատրվակով։ Հենց այդ ընթացքում էլ կարողացել է ահազանգել ոստիկանություն:
Սա վերջին երեք օրվա ընթացքում շտապօգնության բժիշկների նկատմամբ բռնության արդեն երկրորդ դեպքն է։ Եթե այս դեպքում բժիշկները չեն տուժել, ապա հունվարի 13-ին տեղի ունեցած միջադեպից հետո օգնության մեկնած բժիշկն ինքն է տեղափոխվել հիվանդանոց։
«Շտապօգնություն» ՓԲԸ-ի տնօրեն Ռուբեն Գրիգորյանի խոսքով՝ հունվարի առաջին կեսին այդ բուժառուի կողմից արդեն 30-րդ կանչն է եղել, որի ժամանակ ահազանգած քաղաքացին ստիպել է իրեն հոգեմետ դեղեր ներարկել։
Երկու դեպքերի առթիվ էլ նախաձեռնվել է քրեական վարույթ։ Factor TV-ի հետ զրույցում Քննչական կոմիտեի մամուլի քարտուղար Գոռ Աբրահամյանը փոխանցեց՝ առաջին դեպքով վարույթը նախաձեռնվել է ՀՀ քրեական օրենսգրքի 194-րդ հոդվածի 1-ին մասի՝ հոգեկան ներգործության հատկանիշներով, իսկ երկրորդ դեպքի առթիվ քրեական վարույթը նախաձեռնվել է ՀՀ քրեական օրենսգրքի 171-րդ հոդվածի 2-րդ մասի 1-ին և 5-րդ կետերով՝ առողջությանը թեթև վնաս հասցնելու հատկանիշներով։ Նկատենք, որ առաջադրված հոդվածներն ընդհանրական են, այնինչ նախկին օրենսգրքում առանձին պատասխանատվություն էր սահմանվում բուժաշխատողների նկատմամբ բռնության դեպքերի համար։
Հանրային առողջության մասնագետ Դավիթ Մելիք-Նուբարյանը բժշկական պարտականությունները կատարող բժշկի նկատմամբ բռնությունն անթույլատրելի է համարում։ Նրա կարծիքով՝ դա հարված է սեփական կամ հարազատի առողջությանը։
Այս դեպքերը խոսում են այն մասին, որ քաղաքացիների մոտ անհանդուրժողականության կա իրենց մասնագիտական գործունեությունը կատարող բուժաշխատողների նկատմամբ, ինչը բավականին մտահոգիչ է՝կարծիք է հայտնում առողջապահության նախկին նախարար Արսեն Թորոսյանը։ Ըստ նրա՝ խնդիրը նաև անպատժելիությունն է։
Իսկ հնարավո՞ր է, որ կանչով մեկնած բժիշկն է իրեն ոչ պատշաճ պահել, ինչն էլ առաջացրել է հարազատների նման վրդովվմունքը։ Ռուբեն Գրիգորյանը նշում է՝ եղել են նման բժիշկներ, որոնք այլևս համակարգում չեն աշխատում։
2023 թվականին շտապօգնության աշխատողների նկատմամբ բռնության 7 դեպք էր գրանցվել, մեկ դեպքով էլ քաղաքացին փորձել էր կոտրել շտապ բուժօգնության մեքենան։ Թեև բոլոր միջադեպերով նախաձեռնվել են քրեական վարույթներ և քննություններ են ընթանում, բայց պատասխանատվության ենթարկվածներ առայժմ չկան։
Մանրամասները՝ տեսանյութում։
Ռոզա Վարդանյան
