Գյումրիի քաղաքապետարանի աշխատակիցների աշխատավարձերը փոխանցվել են

Գյումրիի քաղաքապետարանի աշխատակիցները և համայնքապետարանի ենթակայությամբ գործող հիմնարկների աշխատակիցները երեկ աշխատավարձ են ստացել։ Այս մասին Factor.am-ի հարցին ի պատասխան ասաց Գյումրիի գլխավոր ճարտարապետ Հենրիկ Գասպարյանը։
Հիշեցնենք՝ Գյումրին հոկտեմբերի 28-ից մնացել է առանց համայնքային իշխանության։ Այդ օրը հրաժարական են տվել քաղաքապետ Վարդգես Սամսոնյանը, տեղակալները, խորհրդականներն ու օգնականները, ինչպես նաև ավագանու «Բալասանյան» դաշինքի անդամները։ Սա աննախադեպ իրավիճակ է Գյումրու կառավարման համակարգում։ Քաղաքում ստեղծվել էին աղբահանության, համայնքային աշխատողների աշխատավարձերի վճարման հետ կապված խնդիրներ։

Ի վերջո, աշխատակիցներին աշխատավարձ են տվել քաղաքապետարանի գլխավոր ֆինանսիստի կողմից համապատասխան փաստատթղթերը ստորագրելուց հետ։ Նրան այդ լիազորությունը Ֆինանսների նախարարությունն է տվել։
Նշենք, որ Գյումրիի կառավարումը ստանձնած «Բալասանյան դաշինքն» ու արդեն նախկին քաղաքապետ Վարդգես Սամսոնյանը որևէ բացատրություն չեն ներկայացրել անսպասելի հրաժարականի վերաբերյալ։ Մինչ այս, սակայն, երկու ուշագրավ իրադարձություն էր տեղի ունեցել․ ավելի վաղ ՔՊ-ն խզել էր դաշինքի հետ համագործակցության կոալիցիան, իսկ վերջերս հայտնի դարձավ, որ նախկին քաղաքապետ Սամվել Բալասանյանն ու ընտանիքի որոշ անդամներ անցնում են քրեական գործերով։ Բալասանյանին կալանավորելու միջնորդություն է ներկայացվել դատարան, նա, սակայն, ԱՄՆ-ում է։ Կալանավորվել, ապա ազատ էին արձակվել նրա որդին՝ Խաչատուր Բալասանյանը և փեսան՝ Ռուբեն Սանոյանը։
Իշխող ՔՊ-ն էլ ստեղծված իրավիճակում ցանկանում է նոր ընտրություններ անել։ Նախնական տվյալներով թեկնածուն ԱԺ պատգամավոր Կարեն Սարուխանյանն է, բայց ՔՊ-ում ոչ բոլորն են հաշտ այս մտքի հետ։

Նարեկ Կիրակոսյան