24.02.2026 | 23:39
Հայաստանի մի շարք հասցեներում էլեկտրաէներգիայի անջատումներ կլինեն
ԱՄՆ Սենատը Մասկից պահանջել է հետ կանչել Tesla ավտոմեքենաների մասերը՝ անվտանգության խախտումների պատճառով
Քաղաքականություն
28.12.2023 | 23:04
Ամերիկացի սենատորներ Էդվարդ Մարքին (Մասաչուսեթս) և Ռիչարդ Բլումենթալը (Կոնեկտիկուտից դեմոկրատ) Tesla-ի սեփականատեր Իլոն Մասկից պահանջել են հետ կանչել էլեկտրական մեքենաների մասերը, որոնք չեն համապատասխանում անվտանգության պահանջներին: Այս մասին ասվում է Մարքիի պաշտոնական կայքում հրապարակված նամակում։
«Մենք ծայրահեղ մտահոգությամբ գրում ենք վերջին հաղորդագրություններից հետո, որ Tesla-ն տեղյակ է իր մեքենաների անվտանգության թերությունների մասին և թաքցնում է այդ թերությունների պատճառները Ճանապարհների երթևեկության անվտանգության ազգային վարչությունից (NHTSA)»,- ասել են սենատորները:
Նրանք պահանջել են «անհապաղ հետ կանչել Tesla-ի բոլոր մասերը, որոնք անվտանգության հետ կապված վտանգ են ներկայացնում, ինչպես նաև կարգավորել NHTSA-ի հետ ստեղծված իրավիճակը»:
Հայտարարության մեջ նշվում է, որ նման նամակ ուղարկելու որոշումը կապված է Reuters-ի կողմից վերջերս հրապարակված հետաքննության հետ։ Դրանում ասվում էր, որ էլեկտրական տրանսպորտային միջոցներ արտադրողը տեղյակ է առկա թերությունների, այդ թվում՝ ղեկի և այլ համակարգերի հետ կապված լուրջ խնդիրների մասին: Սակայն ընկերությունը, ինչպես նշում է Reuters-ը, կարգավորիչից թաքցնում է այդ թերությունների պատճառները և իր հաճախորդներին մեղադրում մեքենաների ոչ ճիշտ աշխատանքի համար։
Սենատորները նշում են, որ Tesla-ն բազմիցս առաջացած խնդիրները կապել է «մեքենայի ոչ ճիշտ օգտագործման» կամ «վարորդի կողմից կոշտ» վերաբերմունքի հետ:
Հայտարարության մեջ նշվում է, որ NHTSA-ն հետաքննում է 2020 թվականին Չինաստանում որոշ մասերի հետկանչման հանգամանքները։ ԱՄՆ-ում դեռևս նման դեպք տեղի չի ունեցել։
