23.07.2026 | 13:05
Նարեկ Կարապետյանի նկատմամբ խափանման միջոց է ընտրվել 1 միլիարդ դրամ գրավն ու բացակայելու արգելքը
ԱՄՆ-ն ավիահարվածներ է հասցրել Իրաքում իրանամետ զինյալների օբյեկտներին՝ ի պատասխան իր անձնակազմերի դեմ հարձակումների
Քաղաքականություն
26.12.2023 | 17:33
Իրաքում և Սիրիայում ամերիկյան անձնակազմի վրա Իրանի աջակցությունը վայելող զինյալների կողմից իրականացված մի շարք հարձակումներին ի պատասխան՝ ԱՄՆ զինված ուժերը հարվածներ են հասցրել Իրաքում երեք օբյեկտի, որն օգտագործվել է «Քաթայիբ Հըզբոլլահ» խմբավորման կողմից։ Այս մասին հայտնել է Պենտագոնի ղեկավար Լլոյդ Օսթինը, փոխանցում է DW-ի ռուսական ծառայությունը։
Նա նշել է, որ «անհրաժեշտ և համաչափ» գերճշգրիտ ավիահարվածները հասցվել են նախագահ Ջո Բայդենի ցուցումով։
Ամերիկացի զինվորականների նախնական տվյալներով՝ գործողության հետևանքով սպանվել են «Հըզբոլլահի» մի շարք զինյալներ, ոչնչացվել են նրանց կողմից օգտագործվող օբյեկտները։
«Այդ հարվածները կոչված են պատասխանատվության ենթարկելու զինյալներին, որոնք անմիջականորեն պատասխանատու են Իրաքում և Սիրիայում կոալիցիոն ուժերի վրա հարձակումների համար, ինչպես նաև սահմանափակելու հետագա հարձակումներ իրականացնելու՝ նրանց հնարավորությունները»,- ասել է ԱՄՆ Կենտրոնական հրամանատարության ղեկավար, գեներալ Մայքլ Կուրիլան:
Ավելի վաղ «Քաթայիբ Հըզբոլլահը» կամիկաձե անօդաչու թռչող սարքերով հարձակվել էր Հյուսիսային Իրաքի քրդերի կողմից վերահսկվող շրջանում գտնվող Էրբիլ ավիաբազայի վրա՝ վիրավորելով երեք ամերիկացի զինծառայողի։
Նշենք, որ ՀԱՄԱՍ-ի և Իսրայելի պատերազմի ֆոնին՝ Իրաքում և Սիրիայում ԱՄՆ բազաների վրա հարձակումները զգալի ավելացել են։
Էմմա Չոբանյան
