29.04.2026 | 15:03
Ադրբեջանը կարող է որոշում ընդունել դադարեցնել համագործակցությունը Եվրախորհրդարանի հետ
Հարցերը պետք է լուծվեն տարածաշրջանի երկրների կողմից առանց կողմնակի միջամտության․ Ռայիսի
Քաղաքականություն
21.12.2023 | 11:22
«Իրանի Իսլամական Հանրապետությունն աջակցում է կովկասյան տարածաշրջանի հետ կապի ուղիների և ենթակառուցվածքների բացման ցանկացած տեսակի գործողություն՝ հարգելով բոլոր երկրների ազգային ինքնիշխանության և տարածքային ամբողջականության սկզբունքը և դա գնահատում է որպես արդյունավետ քայլ Կովկասում խաղաղության ամրապնդման և հարևանների շահերի ապահովման ուղղությամբ»։ Այս մասին հայտարարել է Իրանի նախագահ Իբրահիմ Ռայիսին ՀՀ վարչապետ Նիկոլ Փաշինյանի հետ հեռախոսազրույցում, որը իրանական կողմի փոխանցմամբ կայացել է հայկական կողմի նախաձեռնությամբ։
Ռայիսին Կովկասը բնութագրել է որպես խաղաղության կարիք ունեցող կարևոր տարածաշրջան՝ նշելով, որ Իրանի քաղաքականությունը Կովկասի նկատմամբ հստակ է՝ պետք է այնպես անել, որ կովկասյան տարածաշրջանը մրցակցության դաշտ չդառնա արտատարածաշրջանային երկրների համար, հարցերը պետք է լուծվեն տարածաշրջանի երկրների կողմից առանց կողմնակի միջամտության։
Իրանի նախագահը Թեհրանում տեղի ունեցած 3+3 ձևաչափով հանդիպման հաջող անցկացումը որակել է որպես տարածաշրջանային հարաբերությունների և համագործակցության ամրապնդման և միմյանց հետ տարածաշրջանի երկրների հարաբերությունների կարգավորմանն ուղղված կառուցողական քայլ՝ հավելելով, որ փոխադարձ օգուտների և տարածաշրջանի երկրների շահերի ապահովումն Իրանի Իսլամական Հանրապետության հիմնարար քաղաքականությունն է։
Իրանի նախագահի գրասենյակի տարածած հաղորդագրության համաձայն Փաշինյանն ու Ռայիսին քննարկել են նաև երկու երկրների միջև տնտեսական համագործակցությունը և տարածաշրջանի վերջին զարգացումները։ Ռայիսին նաև Փաշինյանին շնորհավորել է Սուրբ ծննդյան ու ամանորի կապակցությամբ։
