23.07.2026 | 16:42
Ռուբիոն հայտարարել է, թե Ուկրաինայում պատերազմի ավարտի համար «նոր գաղափարներ» են անհրաժեշտ
ԱՄՆ-ը և Ռուսաստանը բանավեճի մեջ են մտել ՄԱԿ-ի Անվտանգության խորհրդում
Քաղաքականություն
20.12.2023 | 20:53
Հյուսիսային Կորեան և Ռուսաստանը ՄԱԿ-ի Անվտանգության խորհրդի արտակարգ նիստում Փհենյանի նոր միջմայրցամաքային բալիստիկ հրթիռի արձակման վերաբերյալ քննարկման ժամանակ բանավեճի մեջ են մտել Միացյալ Նահանգների, Հարավային Կորեայի և նրանց դաշնակիցների հետ, գրում է VOA-ն։
ՄԱԿ-ում Հյուսիսային Կորեայի դեսպան Կիմ Սոնգը հայտարարել է, որ անցնող տարին դարձել է Կորեական թերակղզու ռազմական անվտանգության տեսանկյունից «ամենավտանգավոր տարին»։ Նա մատնանշել է ԱՄՆ-ի և Հարավային Կորեայի զորավարժությունների ավելացումը և ԱՄՆ-ի կողմից այդ տարածքում միջուկային սուզանավերի տեղակայումը:
Միացյալ Նահանգները և նրա 9 դաշնակիցներ հիշեցրել են, որ Հյուսիսային Կորեան այս տարի արձակել է հինգ միջմայրցամաքային բալիստիկ հրթիռ, 25 բալիստիկ հրթիռ և երեք արբանյակ՝ օգտագործելով բալիստիկ հրթիռների տեխնոլոգիա:
Նրանք նշել են, որ դա խախտում է ՄԱԿ-ի Անվտանգության խորհրդի բազմաթիվ բանաձևերը և սպառնում է «իր հարևանների և միջազգային հանրության խաղաղությանը և կայունությանը»։
Խորհրդի նիստից առաջ ԱՄՆ փոխդեսպան Ռոբերտ Վուդը այլ երկրների դիվանագետների ներկայությամբ կարդացել է տասը երկրների համատեղ հայտարարությունը՝ դատապարտելով դեկտեմբերի 17-ին Հյուսիսային Կորեայի միջմայրցամաքային հրթիռների արձակումը և նախորդ արձակումները:
ՄԱԿ-ում Ռուսաստանի փոխդեսպան Աննա Եվստիգնեևան Փհենյանին դատապարտելու փորձերն անվանել է միակողմանի մոտեցում և մեղադրել ԱՄՆ-ին տարածաշրջանում իր լայնածավալ ռազմական մեքենան տեղակայելու համար։
ԱՄՆ փոխդեսպան Վուդը հակադարձել է, որ ԱՄՆ զորավարժությունները պաշտպանական բնույթ են կրում, և որ հենց Հյուսիսային Կորեան է, այլ ոչ թե Հարավային Կորեան, ԱՄՆ-ն կամ Ճապոնիան, որը խախտում է ՄԱԿ-ի պատժամիջոցները։
Դիվանագետն ասել է, որ ԱՄՆ-ը բազմիցս փորձել է առանց նախապայմանների երկխոսություն հաստատել Փհենյանի հետ, սակայն վերջինը հրաժարվել է։
«Մենք չենք կարող աչք փակել ԿԺԴՀ-ի կողմից միջուկային զենքի շարունակական ստեղծման, ինչպես նաև նրա չարամիտ կիբեր գործունեության և մարդու իրավունքների կոպտագույն խախտումների, այդ թվում՝ առևանգումների վրա»,- ասել է Վուդը:
