02.11.2024 | 11:21
Նավթի գները նվազել են
Թուրքիան հերքում է ՀԱՄԱՍ-ի ֆինանսական ցանցի՝ երկրում գտնվելու մասին լուրերը
Քաղաքականություն
20.12.2023 | 22:00
Թուրքիայի գանձապետարանի և ֆինանսների նախարարությունը հրապարակել է հայտարարություն, որը հերքում է դեկտեմբերի 16-ի New York Times-ի հոդվածը, ըստ որի՝ ՀԱՄԱՍ-ի ֆինանսական ցանցի կենտրոնը Թուրքիայում գտնվող ընկերություն է, գրում է Duvar-ը։
«Իսրայելը գտել է ՀԱՄԱՍ-ի փողերի մեքենան շատ տարիներ առաջ. ոչ ոք այն չանջատեց» վերնագրով նյութում լրատվամիջոցը հիշատակում է փաստաթղթեր՝ ձեռք բերված իսրայելական գործողության ընթացքում, որոնք բացահայտում են ՀԱՄԱՍ-ի ակտիվները, դրանցից մեկ էլ թուրքական ֆոնդային բորսայում ցուցակված անշարժ գույքի Trend GYO ընկերությունն է։ Հոդվածում նաև նշվում է, որ թուրքական պետությունը և նախագահ Ռեջեփ Թայիփ Էրդողանը ՀԱՄԱՍ-ը չեն դասում ահաբեկչական կազմակերպությունների շարքին, այլ ընդունում են որպես «ազատագրական խմբավորում»։
«Հոդվածը պարունակում է ապակողմնորոշիչ տեղեկատվություն և խեղաթյուրում է փաստերը՝ կապված ահաբեկչության ֆինանսավորման դեմ Թուրքիայի պայքարի հետ»,- ասվում է նախարարության հայտարարության մեջ։
Գերատեսչությունը նաև նշում է, որ իշխանությունները հետաքննել են ընկերությանն առընթեր իրավաբանական և ֆիզիկական անձանց ու ՀԱՄԱՍ-ի հետ կապ չեն գտել՝ չնայած հոդվածում արված պնդումներին: Ըստ նրանց՝ Թուրքիայի ֆինանսական համակարգը չի չարաշահվել ահաբեկչության ֆինանսավորման համար։
Հայտարարության մեջ նաև հերքվում է որևէ կապ, որ ընկերությունն ունեցել է Իսրայելի վրա ՀԱՄԱՍ-ի կողմից հոկտեմբերի 7-ի հարձակումների հետ։
Էմմա Չոբանյան
