16.09.2024 | 23:29
Թուրքիայի իշխանությունները 2007-2023թթ․ շուրջ մեկ միլիոն կայք են արգելափակել
Վրաստանի վարչապետը խոսել է «հետաքրքիր նախադեպի» մասին. Թբիլիսին փորձում է մերձեցնել Երևանին ու Բաքվին
Քաղաքականություն
19.12.2023 | 13:42
Թբիլիսիի խաղաղ նախաձեռնությունը Հայաստանի և Ադրբեջանի միջև տվել է կոնկրետ արդյունքներ։ Այս մասին հայտարարել է Վրաստանի վարչապետ Իրակլի Ղարիբաշվիլին՝ ներկայացնելով կառավարության 2023 թվականի արդյունքների վերաբերյալ զեկույցի արտաքին քաղաքական մասը։
Նրա խոսքով՝ Վրաստանի իշխանությունները սերտ բարեկամական հարաբերություններ են պահպանում տարածաշրջանի գործընկերների՝ Հայաստանի, Ադրբեջանի և Թուրքիայի հետ։
«Մենք, անշուշտ, շահագրգռված ենք տարածաշրջանում երկարաժամկետ խաղաղության և կայունության հաստատմամբ։ Վրաստանը կարևոր ներդրում ունի այս նպատակին հասնելու գործում։ Որոշ ժամանակ առաջ Վրաստանում էին Ադրբեջանի վարչապետն ու Հայաստանի վարչապետը, և մենք բացառիկ հնարավորություն ունեցանք եռակողմ հանդիպում անցկացնելու։ Կարծում եմ, որ սա հետաքրքիր նախադեպ էր, որին մենք հասանք»,- ասել է Ղարիբաշվիլին։
Նա հիշեցրել է, որ հարևան երկրների միջև ինտենսիվ այցեր են իրականացվել։
«Ես մի քանի անգամ եղել եմ Ադրբեջանում, Ադրբեջանի նախագահն ու Հայաստանի վարչապետը եղել են Վրաստանում։ Մենք շարունակում ենք մեր բարձր մակարդակի ռազմավարական գործընկերությունն ու համագործակցությունը Թուրքիայի հետ»,- հավելել է նա։
