15.10.2026 | 23:20
Գիտության ոլորտին լրացուցիչ 2.35 մլրդ դրամ կհատկացվի․ 12 կենտրոն կվերազինվի
ՃՈ-ն արտասահմանյան համարանիշով մեքենաների խախտումների դեմ պայքարի նոր համակարգ է ներդնելու
Հասարակություն
07.07.2017 | 17:30
ՀՀ ոստիկանությունը արտասահմանյան պետհամարանիշներով ավտոմեքենաների իրավախախտումների դեմ պայքարելու նոր համակարգ է պատրաստվում ներդնել: Այս մասին նշվել է հուլիսի 6-ին Հանրային խորհրդի նիստում, որտեղ քննարկվել են ճանապարհային ոստիկանության խնդիրները:
ՀԽ-ից հայտնում են, որ ՀԽ անդամները ՃՈ պաշտոնյաների առջև բարձրացրել են մասնավորապես, ռուսական համարանիշներով մեքենաների վարորդների՝ երթեւեկության կանոնների բացահայտ խախտման եւ արտոնյալ վիճակում գտնվելու խնդիրը, ինչը ոչ միայն վտանգավոր է երթևեկության համար, այլև անպատժելիության և խտրականության մթնոլորտ է ստեղծում հանրության շրջանում:
Ոստիկանության պետի տեղակալ Սամվել Հովհահնիսյանը հայտնել է, որ այդ խնդիրը նաև ճանապարհային ոստիկանության ուշադրության կենտրոնում է:
Նա նշել է, որ այս պահին, երբ ճանապարհային ոստիկանը կանգնեցնում է ռուսական պետհամարանիշներով ավտոմեքենայի իրավախախտում կատարած վարորդին, վերցնում է վարորդական իրավունքի վկայականը, արձանագրում խախտումը, եւ վարորդն իր վկայականը կարող է ստանալ միայն այն ժամանակ, երբ ՃՈ ներկայացնի վարչական իրավախախտման տուգանքի վճարման անդորագիրը:
Սակայն ոստիկանությունը արտասահմանյան պետհամարանիշներով ավտոմեքենաների իրավախախտումների դեմ պայքարելու մեկ այլ համակարգ է պատրաստվում ներդնել. ՀՀ մտած արտասահմանյան տրանսպորտային միջոցները կֆիքսվեն, և եթե դրանց վարորդները որևէ խախտում արձանագրած կլինեն ու պետության նկատմամբ կունենան պարտավորություն, ապա տուգանքը կվճարեն սահմանին, միաժամանակ կզգուշացվեն, որ հաջորդ անգամ իրենց մուտքը ՀՀ արգելվելու է:
Նշենք, որ ԵՏՄ երկրներում ցանկացած տրանսպորտային միջոց 2 տարի կարող է առանց վերաձեւակերպման օգտագործվել, իսկ տեսանկարահանող սարքերը արտասահմանյան պետհամարանիշներով ավտոմեքենաների խախտումները չեն արձանագրում, քանի որ հնարավոր չէ իրավախախտ վարորդի հասցեով ծանուցում ուղարկել:
