17.12.2025 | 23:17
ԵՄ-ն կոչ է անում Թբիլիսիին ազատ արձակել անօրինական ձերբակալվածներին
Ալիևը Վրաստանի խորհրդարանի նախագահի հետ քննարկել է Բաքվի և Թբիլիսիի «եղբայրական հարաբերությունների զարգացումը»
Քաղաքականություն
11.12.2023 | 18:14
Ադրբեջանի նախագահ Իլհամ Ալիևն այսօր ընդունել է Վրաստանի խորհրդարանի նախագահ Շալվա Պապուաշվիլիի գլխավորած պատվիրակությանը։ Ադրբեջանական կողմի հաղորդմամբ՝ հանդիպմանն Ալիևն ընդգծել է Ադրբեջանի և Վրաստանի միջև բոլոր ոլորտներում «երկկողմ բարեկամական և եղբայրական հարաբերությունների հաջող զարգացումը և նշել Վրաստանի վարչապետի հետ փոխադարձ հանդիպումների դերը երկու երկրների միջև հարաբերությունների ամրապնդման գործում»։
Անդրադառնալով Ադրբեջանի և Վրաստանի կողմից իրականացվող համատեղ նախագծերի կարևորությանը՝ Ալիևը դրանք գնահատել է որպես կարևոր գործոն ավելի լայն տարածաշրջանում՝ եվրասիական տարածքում, և վստահություն հայտնել, որ համատեղ նախաձեռնությունները կշարունակեն հաջողությամբ իրականացվել։
Պապուաշվիլին էլ, կարևորելով երկրների կողմից իրականացվող ծրագրերը, ասել է, որ «դրանք ծառայում են երկու ժողովուրդների բարօրությանը և տարածաշրջանում խաղաղությանը»։ Նա նաև անդրադարձել է տարբեր մակարդակներով իրականացվող փոխայցելությունների ունեցած դերին։
«Հանդիպմանը մտքերի փոխանակություն է տեղի ունեցել նաև էներգետիկայի, տրանսպորտի և մշակույթի ոլորտներում համագործակցության հեռանկարներին առնչվող հարցերի շուրջ»,- ասվում է հաղորդագրության մեջ։
Պապուաշվիլին հանդիպելու է նաև Ադրբեջանի Մեջլիսի խոսնակին ու վարչապետին։
Հիշեցնենք, որ Վրաստանում Ադրբեջանի դեսպան Զուրաբ Պատարաձեն հայտարարել էր, որ Շալվա Պապուաշվիլին Բաքու այցի ընթացքում քննարկելու է նաև Հայաստանի և Ադրբեջանի միջև Թբիլիսիի միջնորդության հարցը։
Էմմա Չոբանյան
