21-ամյա լուսանկարիչ-վավերագրող Հայկ Հարությունյանը ծնվել, ապրել և, ինչպես ինքն է ասում, սիրտը թողել է Ստեփանակերտում։ 7 տարի է, ինչ զբաղվում է լուսանկարչությամբ, իսկ վերջին 3 տարում վավերագրել է այն ամենը, ինչ կատարվեց Արցախում։
Վավերագրվող վերջին դրվագները երկօրյա պատերազմից էին։ Նրա կադրերում հարվածների թիրախում հայտնված Ստեփանակերտն է, քաղաքացիական այն օբյեկտները, որոնք ռմբակոծել է Ադրբեջանը, ձեռքի տակ ընկած առաջին իսկ հագուստով ապաստարաններ վազող մարդիկ։
«Ամենամեծ ողբերգությունը սկսվեց, երբ հրադադար հայտարարվեց, և երբ տեղահանվածները Մարտակերտի, Մարտունու շրջանից հասան Ստեփանակերտ։ Մարդիկ մնալու տեղ չունեին, քնում էին գետնին։ Այդ ժամանակ հասկացանք, թե իրականում ինչ է կատարվում»,- Factor TV-ի հետ զրույցում պատմում է Հայկը։
Նրա ֆոտոխցիկը ֆիքսել է առաջին տունը, որն այրվել է ստեփանակերտցու ձեռքով։ Հայկը հիշում է, որ դա իր արձանագրած ամենացավոտ տեսարաններից է եղել։ Հայկը տեղահանման ճանապարհին արդեն այնքան կոտրված է եղել, որ դժվարությամբ է լուսանկարչական ապարատը ձեռքն առել, միայն վերջում, երբ հասել են Հակարիի կամրջի մոտ, կարողացել է մի քանի կադր ֆիքսել։
«Մինչև հիմա չեմ կարողանում հասկանալ՝ ինչ է կատարվել մեզ հետ։ Ինձ համար այս ամենն իրական լինել չի կարող, թվում է՝ շուտով ամեն բան առաջվանը կլինի։ Հետաքրքիր է՝ ոնց ենք մենք կարողանում խաբել ինքներս մեզ»,- ասում է Հայկը։
Մանրամասները՝ տեսանյութում։
Աննա Բաբաջանյան
