«Խնդիրը Ռոբերտ Քոչարյանը չէ, այլ` ներկայացված մեղադրանքը». ՀՅԴ ԳՄ անդամ. ՏԵՍԱՆՅՈՒԹ

Դաշնակցությունը մտադիր չէ հրաժարվել իշխանությունների հետ համագործակցությունից Ռոբերտ Քոչարյանի կալանավորման առիթով արված հայտարարության պատճառով, ըստ որի՝ նախկին նախագահին սահմանադրական կարգը տապալելու մեղադրանք ներկայացնելը կարող է մեկնաբանվել որպես քաղաքական հալածանք։ «Ավելի շուտ որպես գործընկեր՝ իշխանությունները պետք է մեր մտահոգությունները նկատի ունենան, որովհետև, ինչպես գիտենք, պարոն Փաշինյանը հայտարարել է, որ ինքը արդարադատության համակարգի վրա ազդեցություն չի գործելու և արդարադատությունը պետք է լիարժեք լինի Հայաստանում։ Հետևաբար այս ուղեգիծը մեր ուղեգիծն է, այստեղ մենք տարակարծություն չունենք»,- ասում է ՀՅԴ ԳՄ անդամ Արթուր Եղիազարյանը։

Ըստ նրա, Դաշնակցության հայտարարությունը չի կարելի կտրել կոնտեքստից և կարևորել միայն «քաղաքական հալածանք» ձևակերպումը: «Եթե անկեղծ, Ռոբերտ Քոչարյանին ապօրինի հարստացման, իր լիազորությունների վերազանցման քրեական հոդվածներ ներկայացվեին, այստեղ խնդիր չկար, բայց բռնի ուժով իշխանություն զավթելը, կարծում եմ, ճիշտ մեղադրանք չի իր հետևանքներով»,- տարակուսում է նա։

Պարոն Եղիազարյանը չի հասկանում նրանց, որոնք Դաշնակցության հայտարարությունը համարում են Ռոբերտ Քոչարյանի պաշտպանության քաղաքական ակցիա։ «Ռոբերտ Քոչարյանը Դաշնակցության հետ կապ չունի։ Մենք նույնը չենք, մենք տարբեր ենք, եթե ժամանակին անհրաժեշտություն է եղել քաղաքական համագործակցության, դա քաղաքական համագործակցություն է, դա այլ միություն չէ, դա մեկի շահերը սպասարկել չի»,- վստահեցնում է ԳՄ անդամը։

Դաշնակցությունը տեսնում է արդարադատության կայացմանն ուղղված կարևոր քայլերը, սակայն Քոչարյանի պարագայում էականը կալանավորումը չէ, այլ՝ իրավական հիմնավորումները, որոնք պետք է պատճառաբանված լինեն: «Մենք անձ պաշտպանելու խնդիր չունենք, օրենքի առաջ բոլորը պետք է հավասար լինեն, բայց համապատասխան ճիշտ հոդվածով»,- ասում է պարոն Եղիազարյանը։

Գերագույն մարմնի անդամը վստահեցնում է, որ գործող իշխանությունը որևէ խնդիր չի տեսել Դաշնակցության հայտարարության հետ կապված․ «Եթե անգամ հակառակ դերում լիներ և այդ մեղադրանքը լիներ այսօր գործող իշխանության հանդեպ, մենք էլի նույն մտահոգությունը հայտնելու էինք»։

Ի դեպ, պարոն Եղիազարյանը մեկնաբանեց նաև Նիկոլ Փաշինյանի վերջին հայտարարությունը հայ-թուրքական հարաբերությունների հետ կապված։ Փաշինյանը կարևորել էր դրանք՝ նկատելով, որ հարաբերությունները պետք է հաստատվեն առանց նախապայմանների։ «Վարչապետը այն մոտեցումով է ասել, ինչը նաև մեր մոտեցումն է, խնդիրը արդեն հայ-թուրքական հարաբերությունը չէ, վերադարձ չի կարող լինել այդ արձանագրությունների շրջանին»,- թեման փակում է Արթուր Եղիազարյանը։

Մհեր Արշակյան