23.07.2026 | 23:28
Կապանը` ԱՊՀ 2026 թվականի երիտասարդական մայրաքաղաք
ՌԴ-ն Ֆինլանդիայի հետ սահմանին հիբրիդային պատերազմի մարտավարություն է կիրառում. ISW
Քաղաքականություն
21.11.2023 | 14:46
Ռուսաստանը հիբրիդային պատերազմի մարտավարություն է կիրառում՝ արհեստականորեն միգրացիոն ճգնաժամ ստեղծելով Ֆինլանդիայի սահմանին։ Այս մասին ասվում է Պատերազմի ուսումնասիրության ինստիտուտի (ISW) զեկույցում։
Դրա համաձայն՝ ռուս-ֆիննական սահմանին հիբրիդային պատերազմի մարտավարությունը նման է այն բանին, թե ինչպես Ռուսաստանն ու Բելառուսը ստեղծեցին միգրացիոն ճգնաժամ Լեհաստանի սահմանին 2021 թվականին, և, հավանաբար, նույն կերպ ուղղված է ՆԱՏՕ-ի ապակայունացմանը:
Այնուհետև Կրեմլն օգտվել է 2021 թվականի հորինված ճգնաժամից՝ ՆԱՏՕ-ին մեղադրելով Բելառուսի դեմ ագրեսիայի մեջ։ Ռուսաստանի Դաշնությունը բազմիցս հայտարարել է, որ կձեռնարկի ցանկացած հակաքայլ, որն անհրաժեշտ է համարում սեփական անվտանգությունն ապահովելու համար։ ISW-ի փորձագետները համոզված են, որ Ֆինլանդիայում միգրացիոն ճգնաժամ ստեղծելու փորձը ՆԱՏՕ-ի երկրներում քաղաքական իրավիճակն ապակայունացնելու քայլերից մեկն է։
Ֆինլանդիայի իշխանությունները նոյեմբերի 18-ին փակել են Ռուսաստանի հետ երկրի հարավ-արևելյան սահմանի չորս անցակետեր այն բանից հետո, երբ Ֆինլանդիայի սահմանապահ ծառայությունը հայտնել է, որ 2023 թվականի սեպտեմբերից մոտ 300 ապաստան հայցողներ, հիմնականում Իրաքից, Եմենից, Սոմալիից, Ռուսաստանից ժամանել են Ֆինլանդիայի սահման:
Ֆիննական Iltalehti հրատարակությունը նոյեմբերի 20-ին հայտնել է, որ իշխանությունները քննարկում են նոյեմբերի 21-ի գիշերը Ռուսաստանի հետ ամբողջ սահմանը փակելու հարցը։
«Քիչ հավանական է, որ այս միգրանտները մնացել են Ֆինլանդիայի սահմանին զրոյից ցածր ջերմաստիճանի պայմաններում, երբ սահմանապահները թույլ չեն տվել նրանց մտնել Ֆինլանդիայի տարածք, և դա խոսում է այն մասին, որ Ռուսաստանը, ամենայն հավանականությամբ, ներգրավված է այս իրավիճակում»,- ասել են փորձագետները:
