Քաղաքականություն
15.11.2023 | 17:25
Թուրքիայի նախագահ Ռեջեփ Թայիփ Էրդողանը խորհրդարանում իշխող խմբակցության հետ հանդիպմանն ունեցած ելույթում կրկին քննադատել է Իսրայելին Գազայում ռազմական գործողությունների համար՝ հիշատակելով նաև Հայաստանին, հաղորդում է TRT Haber-ը։
«Եթե ամեն ոլորտում ուժեղ չլինենք քաղաքականությամբ, տնտեսությամբ, սոցիալական կառուցվածքով, ռազմական հզորությամբ ու անվտանգությամբ, մեզ թույլ չեն տա ապրել այս հողերում։ Այն շրջանակները, որոնք չարամտություն ունեն մեր հայրենիքի նկատմամբ, ինչ-որ կերպ բացահայտում են իրենց՝ որքան էլ ուշադիր գործեն։ Հայաստանը տարիներ շարունակ մեր երկրի տարածքների մասին երազանքներ ուներ։ Նա իր դասը քաղեց Ղարաբաղյան պատերազմից ու նորից նստեց իր տեղը։ Այժմ իսրայելցի վարչարարներն են սկսել նման մոլորություններ արտահայտել։ Մի՛ անհանգստացեք, նրանք կհայտնվեն հիասթափության մեջ, ինչպես անթիվ ուրիշներ, որոնք հազարավոր տարիներ նման երազանքներ են ունեցել»,- հայտարարել է Էրդողանը։
Հիշեցնենք՝ Թուրքիայի նախագահը նույն հանդիպման ժամանակ ունեցած ելույթում Իսրայելն «ահաբեկչական պետություն» էր անվանել, որը ռազմական հանցագործություններ է կատարում և խախտում է միջազգային իրավունքը Գազայի հատվածում։
Էմմա Չոբանյան
