Քաղաքականություն
27.07.2018 | 14:13
Այսօր Շենգավիթի ընդհանուր իրավասության դատարանում վերսկսվել է ՀՀ 2-րդ նախագահ Ռոբերտ Քոչարյանին կալանավորելու միջնորդության քննությունը, որին ներկա է պաշտոնաթող նախագահը։ Factor.am-ը «Մարտի 1»-ի ոճրագործությանը նվիրված՝ «Հայաստանի կորսված գարունը» ֆիլմի հեղինակ Տիգրան Պասկևիչյանից փորձեց լսել վերջինիս տեսակետը Ռոբերտ Քոչարյանի հարցաքննության և հնարավոր կալանավորման որոշման վերաբերյալ։
Մեր հարցին ի պատասխան՝ Տիգրան Պասկևիչյանն ասաց․ «Ես չեմ ցանկանում գնահատել այդ գործողությունները, ես այդ թեմայով չեմ ուզում հարցազրույց տալ»։
Հարցին՝ ինչով է պայմանավորված իր այս լռությունը՝ Տիգրան Պասկևիչյանը պատասխանեց հարցով․ «Ես իրավունք ունեմ, չէ՞ հրաժարվել հարցազրույցից, ուրեմն՝ հրաժարվում եմ»։
Հիշեցնենք, որ բոլորովին վերջերս լրագրողների հետ հանդիպման ժամանակ, խոսելով «Մարտի 1-ի» բացահայտման մասին, նա ասել էր․ «Ես լավատես չեմ, քանի դեռ այս գործով Ռոբերտ Քոչարյանը կալանավորված չէ, իսկ աստիճանները վերևից պետք է սկսել մաքրել, Ռ․ Քոչարյանը, եթե կալանավորված լինի, նրա դիմաց պետք է դնել 2009-2011 թվականներին կազմված 4 զեկույցները, որտեղ մանրամասն գրված է՝ ով զենքը ումից վերցրեց և ում տվեց»։
