08.08.2026 | 15:38
Ողջույն Հայաստան. NVIDIA-ի հիմնադիր Ջենսեն Հուանգը շնորհավորել է Firebird-ի ԱԲ գործարանի բացման առիթով
Քիչ անց կմեկնարկի Եվրասիական միջկառավարական խորհրդի նիստը. նախատեսված է նաև Փաշինյան-Մեդվեդև հանդիպում
Քաղաքականություն
27.07.2018 | 11:16
Քիչ անց Սանկտ Պետերբուրգում կմեկնարկի Եվրասիական միջկառավարական խորհրդի նիստը՝ անդամ պետությունների կառավարությունների ղեկավարների մասնակցությամբ: Հայաստանից նիստին մասնակցելու նպատակով Սանկտ Պետերբուրգ է ժամանել վարչապետ Նիկոլ Փաշինյանի գլխավորած պատվիրակությունը:
Ավելի վաղ, անդրադառնալով Սանկտ Պետերբուրգ կատարելիք այցին, վարչապետ Փաշինյանն իր ֆեյսբուքյան էջում հայտնել էր, որ թեև հանդիպումը վարչապետների ֆորմատով է, բայց ինքը դեռ թավշյա հեղափոխության օրերին է հայտարարել, որ ԵՏՄ-ն կաթվածահար անելն իրենց նպատակը չէ, ընդհակառակը՝ պիտի ամեն ինչ անեն այդ կազմակերպությանը Հայաստանի անդամակցությունն առավել արդյունավետ դարձնելու համար:
«Ինչպես հայտնի է, սահմանադրական փոփոխություններից հետո ձեռք բերած կարգավիճակի բերումով Հայաստանի վարչապետը ներգրավված է ԵՏՄ Բարձրագույն տնտեսական խորհրդում՝ երկրների ղեկավարների ֆորմատում և այս հարցը լուծված է նաև դե յուրե, այսինքն՝ այստեղ Հայաստանը շարունակելու է ներկայացնել վարչապետը: Բայց ԵՏՄ միջկառավարական խորհրդի աշխատանքի իրավական կարգավորումները դեռևս չեն համապատասխանեցվել ՀՀ Սահմանադրության նոր տեքստին և վարչապետերի խորհրդի նիստին իմ չմասնակցելու պարագայում որոշումներ չէին կարող ընդունվել և ֆորմատը կաթվածահար կլիներ»,- պարզաբանել էր ՀՀ վարչապետը:
Հիշեցնենք՝ երեկ վարչապետը Սանկտ Պետերբուրգ ժամանելուց հետո հանդիպում ունեցավ ՌԴ հյուսիս-արևմտյան տարածաշրջանի հայազգի մի քանի տասնյակ գործարարների հետ: Հանդիպման ամենաուշագրավ դրվագն այն էր, որ հայազգի գործարարներից մեկը՝ Մուրադ Մուրադյան անուն-ազգանունով, վարչապետին հայտնեց ԱԺ ՀՀԿ խմբակցության պատգամավոր, գործարար Աշոտ Արսենյանի կողմից իր նկատմամբ մահափորձ իրականացնելու մասին: «Ես 21 տարի սպասել եմ արդեն նախկին իշխանության տապալմանը, որպեսզի այդ մասին բարձրաձայնեմ»,- շեշտեց Մուրադ Մուրադյանը՝ ցանկություն հայտնելով 21 տարվա ընդմիջումից հետո վարչապետ Փաշինյանի օդանավով Հայաստան վերադառնալ:
Անդրադառնալով արդեն այսօրվա նիստին՝ նշենք, որ ընդլայնված կազմով նիստից հետո նախատեսված է նաև ՀՀ և ՌԴ վարչապետների՝ Նիկոլ Փաշինյանի և Դմիտրի Մեդվեդևի հանդիպումը:
Շողիկ Գալստյան
