«Հակոբ Կոջոյան» կրթահամալիրի սաները հաջողություններ են գրանցում տեղական և միջազգային հարթակներում

«Հակոբ Կոջոյան» կրթահամալիրի սաները հանրակրթական առարկաներից բացի սովորում են քանդակել, նկարել, ծանոթանում են թատրոնին ու թատերական արվեստի նրբություններին, գնահատում արվեստն ու մշակույթը և հաճախ մասնագիտանում հենց այդ բնագավառներում: 2023 թվականին նրանք մեծ հաջողություններ են գրանցել ինչպես Հայաստանում, այնպես էլ միջազգային կրթական հարթակներում:

«Արմենպրես»-ի թղթակցի հետ զրույցում կրթահամալիրի տնօրեն Ռուզաննա Երեմյանը հպարտությամբ է նշում՝ տարին լի է եղել հաղթանակներով. հաջողության են հասել «Կորիզ» համահայկական մրցույթում, «Նռան հատիկ» մանկապատանեկան թատերական փառատոնում և այլ հարթակներում: «Հաղթող սերունդ ենք դաստիարականում. միայն հաղթողները կարող են առաջնորդ դառնալ, իսկ մեր երկիրն առաջնորդների կարիք ունի»,-շեշտում է նա և հավելում՝ «Կորիզ»-ն առցանց մրցույթ է, որի նպատակը սովորողների դպրոցական մակարդակում ստացած գիտելիքները ստուգելն է: «Այն համարվում է դպրոցական «Օսկար»: 2022-ին մեր աշակերտները հաջողություն են գրանցել այդ մրցույթում. ունեցել ենք մեկ առաջին և մեկ երկրորդ մրցանակակիր: 2023-ին երկու առաջին մրցանակակիր ունեցանք, այսինքն՝ բարելավեցինք մեր արդյունքները: Եվս երկու աշակերտ ընդգրկվել է լավագույն տասնյակում»,-հայտնում է նա:

Երեմյանի համար հաճելի է կրթահամալիրի սաների հաղթանակը, սակայն առավել հաճելի է այն փաստը, որ նախորդ տարվա հաղթողները կրկնել են իրենց հաջողություններն ու առաջին մրցանակակիրներ դարձել:

«Կորիզ»-ում հաղթել են Մհեր Ասատրյանը, Ալեքսանդր Ֆրանգուլյանը, լավագույն տասնյակում ընդգրկվել են Մանե Ղամբարյանը, Աիդա Հայրապետյանը: «Հակոբ Կոջոյան» կրթահամալիրը միակն է, որ երկու առաջին մրցանակակիր է ունեցել:

Տնօրենի խոսքով՝ այդ հաղթանակները ոգևորիչ են այլ դասարանների սովորողների համար, քանի որ նրանք հասկանում են, որ գիտելիքով կարող են մրցանակակիր դառնալ, իսկ միջազգային բուհեր ընդունվելու պարագայում մրցանակների շնորհիվ կրթաթոշակներից օգտվել:

«Շատ կարևոր են նաև նվերները: «Կորիզ»-ի թիմը լավ նվերներ էր պատրաստել հաղթողների համար: Ալեքսանդր Ֆրանգուլյանը, որ նախորդ տարի ևս առաջին մրցանակակիր է եղել, իր ստացած նոթբուքը նվիրեց մեր դպրոցին ու ասաց, որ այն ոչ միայն իր, այլև իր ուսուցիչների նվերն է: Մեր աշակերտները շնորհակալության զգացում ունեն: Մեզ մոտ միմյանց օգնելու, աջակցելու, իրար կողքի կանգնելու, մեկը մյուսի հաղթանակով ուրախանալու մթնոլորտ է տիրում»,-նշում է Ռուզաննա Երեմյանը:

Կրթահամալիրի սաները տարվա ընթացքում նաև մասնակցել են զբոսաշրջությանը նվիրված մրցույթի, որտեղ առաջին տեղն են զբաղեցրել: Նրանք ուսումնասիրել են Երևանի կենտրոնի զբոսաշրջային գրավչություններն ու զբոսաշրջային նախագիծ մշակել, որը հաղթել է, իսկ «Նռան հատիկ» փառատոնին, որն անցկացվել է 23-րդ անգամ, «Հակոբ Կոջոյան» կրթահամալիրի սաները մասնակցում են ավելի քան տասը տարի և ամեն տարի մրցանակային տեղեր զբաղեցնում: Այս տարի փառատոնի շրջանակում 5-րդ դասարանի սաները հանդես են եկել Հովհաննես Շիրազի «Բիբլիական» պոեմի հիման վրա բեմադրված ներկայացմամբ, որը Ռուզան Երեմյանը բարդ ստեղծագործություն է համարում: «Դահլիճում նստած գեթ մեկ մարդ չկար, որին չտպավորեր երեխաների և՛ դերասանական խաղը, և՛ արտիստիզմը, կերպարները զգալու հմտությունը: Մեր կրթահամալիրում «Թատրոն» առարկան անցնում են առաջին դասարանից, մեր սաները բազմակողմանի կրթություն են ստանում, քանի որ մենք կերպարվեստի թեքումով միակ դպրոցն ենք հանրապետությունում, որտեղ առաջինից 12-րդ դասարանում բոլորը նկարում են, քանդակում են, դիզայն են անցնում, արվեստի պատմություն, դիցաբանություն և այլն»,-տեղեկացնում է նա:

Տնօրենը հավաստիացնում է՝ կրթահամալիրն ավարտում են բազմակողմանի զարգացած և կիրթ մարդիկ: Նրանց յոթանասուն տոկոսը մասնագիտանում է արվեստի բնագավառում: Նրանք ճարտարապետներ են, դիզայներներ են, գրքարվեստով, ինտերիերով, էքստերիերով զբաղվող մարդիկ են, քանդակագործներ են, բայց աշակերտների երեսուն տոկոսն ընտրում է այլ մասնագիտություն՝ բժիշկներ, իրավաբաններ, ծրագրավորողներ, ուսուցիչներ: Այժմ կրթահամալիրում աշխատում է այն ավարտած վեց ուսուցիչ:

«Մեր խնդիրը կիրթ, հասարակությանը պիտանի, մտածող քաղաքացի դաստիարակելն է: Օրինակ՝ «Կորիզ» մրցանակաբաշխությանը, որը հիմնադրվել է 2020 թվականին, մեր սաները մասնակցում են երկրորդ անգամ: Երկու տարի նրանք լավագույններից են և հաղթում են բողոքարկելու միջոցով: Երբ նրանք հարցի մեջ սխալ են տեսնում, վերլուծում են այն, եթե տեսնում են, որ պատասխանը դպրոցական դասագրքում չկա, բարձրաձայնում են այդ մասին: Մեր աշակերտները համակերպվող քաղաքցիներ չեն, նրանք մտածող մարդիկ են: Մենք նրանց դաստիարակում ենք այնպես, որ չլինեն ենթարկվող, չխուսափեն սեփական կարծիքն արտահայտելուց: Խրախուսում ենք նրանց՝ կարծիք ունենալու, եթե վստահ են, որ ճիշտ են, այդ ճիշտը պնդելու իրավունքը, եթե սխալ ենք, պատրաստ ենք անգամ ներողություն խնդրել նրանցից»,-ասում է Երեմյանը:

Կրթահամալիրի սաները չեն սահմանափակվում Հայաստանի սահմաններում անցկացվող մրցույթներին մասնակցությամբ և իրենց ուժերը փորձում են նաև միջազգային հարթակներում: Մասնակցում են միջազգային փառատոնների, ցուցահանդեսների: Վերջերս աշխատանքներ են ուղարկել Եգիպտոս՝ «Եգիպտոսն աշխարհի երեխաների աչքերով» ցուցահանդեսին մասնակցելու համար: Ճապոնիային նվիրված ցուցահանդեսի ևս մասնակցել են և հաջողել:

«Կրթությունն ամենակարևորն է. եթե մենք ցանկանում ենք փոխել հասարակությունը, եթե ուզում ենք ունենալ սերունդ, որ պետք է կառուցի հզոր երկիր, ուրեմն պետք է ամենամեծ ներդրումն անենք կրթության ոլորտում, խրախուսենք ցանկացած նորարարական մոտեցում, որը միտված է երեխայի ճիշտ դաստիարակությանը»,-եզրափակում է Ռուզաննա Երեմյանը: