24.11.2024 | 17:00
Ֆրանսիայի Բրոն համայնքում Մեղրի քաղաքի պուրակ է բացվել
Ռուսական ԶԼՄ-ները հայտնում են Կուրսկի ԱԷԿ-ի վրա ԱԹՍ-ներով հարձակման մասին
Քաղաքականություն
27.10.2023 | 14:35
Պայթուցիկներով լիցքավորված անօդաչու թռչող սարքերը երեկ երեկոյան երեք անգամ փորձել են գրոհել Կուրչատով քաղաքի Կուրսկի ատոմակայանը։ Նման տեղեկություններ են տարածում ռուսական լրատվամիջոցները, որոնց վկայակոչում է BBC-ի ռուսական ծառայությունը։
Նշվում է, որ անօդաչուներից մեկը պայթել է միջուկային թափոնների պահեստավորման օբյեկտի մոտ։
Baza տելեգրամյան ալիքի հաղորդմամբ՝ առաջին անօդաչու թռչող սարքն ընկել է շների վարժեցման ճամբարի տարածքում և չի պայթել։ Երկրորդ՝ ինքնաթիռի տիպի ռեակտիվ անօդաչու թռչող սարքը հայտնաբերվել է ասֆալտին․ այն նույնպես չի պայթել։ Իսկ երրորդ ԱԹՍ-ն, ըստ ռուսական կողմի, հարձակվել է միջուկային թափոններով պահեստի վրա: Ըստ Baza-ի աղբյուրների՝ պայթյունը վնասել է պահեստի շենքի ճակատամասը։
Նման վարկած է ներկայացնում նաև Shot տելեգրամյան ալիքը՝ նշելով, որ ԱԹՍ-ները պատկանել են Ուկրաինայի Զինված ուժերին։
Ռուսաստանի ՊՆ-ն էլ հայտարարել է Մոսկվայի ժամանակով մոտ 21:00-ին Կուրչատովի շրջանում ուկրաինական անօդաչու թռչող սարք որսալու մասին՝ չհայտնելով դրա հետևանքների մասին։
Ուկրաինական կողմը դեռևս չի մեկնաբանել այս հայտարարությունները։
Էմմա Չոբանյան
