30.04.2026 | 13:36
Գնում ենք, տեսնում ենք Արծվաշենում մզկիթ ա կառուցվել, ասելու ենք՝ պատմամշակութային արժե՞ք ա. Փաշինյան․ ՏԵՍԱՆՅՈՒԹ
ԵԽԽՎ պատգամավորները կոչ են արել Ադրբեջանում քաղբանտարկյալների հարցով զեկուցող նշանակել
Քաղաքականություն
25.10.2023 | 22:08
ԵԽԽՎ պատգամավորները հանդես են եկել Ադրբեջանում քաղբանտարկյալների հարցով զեկուցող նշանակելու նախաձեռնությամբ, գրում են ադրբեջանական լրատվամիջոցները։
Հաղորդվում է, որ զեկուցողի նշանակման ընթացակարգի նախաձեռնողը Շվեյցարիայից պատգամավոր Սիբել Արսլանն էր, որին աջակցում են 23 այլ պատգամավորներ Ավստրիայից, Մեծ Բրիտանիայից, Կիպրոսից, Գերմանիայից, Պորտուգալիայից, Իսպանիայից, Բելգիայից, Ռումինիայից, Իռլանդիայից, Թուրքիայից, Իտալիայից, Հունաստանից, Մոլդովայից և Իսլանդիայից։
Պատգամավորներն իրենց «տագնապն են արտահայտում 2023 թվականի սկզբից ադրբեջանցի լրագրողների, ակտիվիստների, բնապահպան իրավապաշտպանների, ընդդիմադիրների և խղճի բանտարկյալների նկատմամբ բռնաճնշումների ուժեղացման կապակցությամբ»։
Նրանք ահազանգում են, որ Ադրբեջանում քաղաքացիական հասարակության ճնշումներն ավելի ակնհայտ են, քան երբևէ, մինչդեռ կառավարական ճնշումները և քաղաքական հետապնդումները շարունակում են մնալ քննադատական ձայները վախեցնելու և լռեցնելու հիմնական գործիքները։
Նշվում է, որ 12 ամսում Ադրբեջանում քաղբանտարկյալների թիվը կրկնապատկվել է՝ 99-ից հասնելով ավելի քան 200 մարդու։ Պատգամավորների կարծիքով՝ ԵԽԽՎ-ն պետք է նշանակի զեկուցող, որը կուսումնասիրի քաղբանտարկյալների աճող խնդիրը և Ադրբեջանի կառավարության կողմից իրականացվող ահաբեկման գործողությունները, ինչը կհանգեցնի համապարփակ զեկույցի պատրաստման։
Նախկինում ԵԽԽՎ-ն երկու անգամ քննարկել է Ադրբեջանում քաղբանտարկյալների վերաբերյալ զեկույցները։ Քրիստոֆ Շտրասերի զեկույցը տապալվել է 2013 թվականին, սակայն 2020 թվականին ԵԽԽՎ-ն բանաձև է ընդունել՝ հիմնված Սուննա Էվրադսոտիրի զեկույցի վրա, որը կոչ էր անում Ադրբեջանի իշխանություններին անհապաղ ազատ արձակել բոլոր քաղբանտարկյալներին։
Էմմա Չոբանյան
