Քաղաքականություն
25.10.2023 | 16:46
Ադրբեջանի բարձրաստիճան պաշտոնյաները հերքում են այն պնդումները, թե Հայաստանի հետ նոր հակամարտություն է սպասվում՝ հերքելով ենթադրությունները, որ պատրաստվում են ուժ կիրառել՝ հարձակվելով Հայաստանի վրա, նաև նշելով, թե շուտով խաղաղության պայմանագիր կարող է կնքվել։ POLITICO-ի հետ զրույցում Ադրբեջանի նախագահ Իլհամ Ալիևի օգնական Հիքմեթ Հաջիևն ասել է, որ իր երկիրը մտադիր չէ գրավել Սյունիքը՝ այն բանից հետո, երբ երկու կողմերը չկարողացան համաձայնության գալ ճանապարհի բացման շուրջ: Նախագիծը, նրա խոսքով, «կորցրել է իր գրավչությունը Բաքվի համար, փոխարենը կարող են դա անել Իրանի հետ»:
«Մեր օրակարգը վերաբերում էր միայն երկկողմանի ներգրավվածության շրջանակում տրանսպորտային կապերի և հաղորդակցության կառուցմանը։ Այն դեռ սեղանին է, բայց հայկական կողմից կպահանջվի ցույց տալ, որ իրոք հետաքրքրված են դրանով»,- ասել է Հաջիևը:
«Հայաստանի դիրքորոշումը միշտ էլ հստակ է եղել տարածաշրջանային հաղորդակցությունների ապաշրջափակման հարցում։ Այն պետք է հիմնված լինի պետությունների ինքնիշխանության և իրավասության, փոխադարձության և հավասարության սկզբունքների վրա»,- լրատվամիջոցին ասել է ՀՀ ԱԳՆ խոսնակ Անի Բադալյանը։
Լրատվականը նաև նշում է, որ, այնուամենայիվ, ԵՄ-ի դերը՝ որպես հակամարտությունում միջնորդ, այժմ վտանգի տակ է, քանի որ Բրյուսելում բանակցությունները, որոնք նախատեսված էին այս ամիս, հետաձգվել են՝ Իրանում խաղաղ համաձայնագրի շուրջ բանակցություններից օրեր անց, որին մասնակցում էր Ռուսաստանը: ԵՄ բարձրաստիճան պաշտոնյան, սակայն, անանունության պայմանով ասել է, որ դաշինքը չի կորցնում իր ազդեցությունը, պարզապես կազմակերպման համար ավելի երկար ժամանակ է պահանջվում։
Էմմա Չոբանյան
