25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
Թուրք-ադրբեջանական զորավարժություններին F-16-ներով և «Բայրաքթար»-ներով փորձում են «Իսկանդեր» ոչնչացնել
Քաղաքականություն
24.10.2023 | 14:56
Ադրբեջանում մեկնարկած «Մուսթաֆա Քեմալ Աթաթուրք-2023» մարտավարական համատեղ զորավարժությունների ընթացքում, որը նվիրված է Թուրքիայի Հանրապետության հիմնադրման 100-ամյակին, թուրքական F-16 կործանիչներն ու հարվածային ուղղաթիռները, օգտագործելով Bayraktar TB-2 անօդաչուները, մոդելավորել են պայմանական հակառակորդի «Իսկանդեր» և «Տոչկա-Ու» մարտավարական հրթիռային համակարգերի ոչնչացումը։ Այս մասին հայտնում են տեղական լրատվամիջոցները։
Նշվում է, որ հակատանկային հրթիռային համակարգերը և Տ-90 տանկերը ոչնչացրել են մարտական զրահատեխնիկա և 1-ին էշելոնում տեղակայված հակառակորդի դիրքերը։ Հրետանային կայանքներն էլ զանգվածային հարձակումներ են իրականացրել հակառակորդի հրամանատարական դիտակետերի, կենդանի ուժի և կրակային զենքերի վրա։
Այսօր զորավարժությունների շրջանակում անցկացվում է «Բարձրաստիճան դիտորդների օրը»։ Նշվում է, որ համատեղ զորավարժություններին հետևում են Ադրբեջանի ՊՆ ղեկավար Զաքիր Հասանովը և Թուրքիայի պաշտպանության նախարար Յաշար Գյուլերը, որոնց միացել են Տաջիկստանի պաշտպանության նախարար Շերալի Միրզոյի, Ղազախստանի Պաշտպանության նախարարության ռազմական կրթության և գիտության վարչության պետ, գեներալ-մայոր Ժումաբեկ Ահմետովի և Ուզբեկստանի պաշտպանության նախարարի մարտական պատրաստության գծով տեղակալ, գնդապետ Կադիրժոն Տուրսունովի գլխավորած պատվիրակությունները, թուրքական պաշտպանական արդյունաբերության մի քանի ընկերությունների ղեկավարներ և ներկայացուցիչներ։
Հիշեցնենք, որ Տաջիկստանն ու Ղազախստանը Հայաստանի հետ միասին ՀԱՊԿ անդամ պետություններ են։
Էմմա Չոբանյան
