24.07.2026 | 14:49
Էբոլայի իրավիճակը աշխարհում՝ հուլիսի 24-ի դրությամբ
Էմանուել Մակրոնը ժամանել է Իսրայել
Քաղաքականություն
24.10.2023 | 12:41
Ֆրանսիայի նախագահ Էմանուել Մակրոնը ժամանել է Թել Ավիվ՝ համերաշխություն հայտնելու Իսրայելին հոկտեմբերի 7-ին պաղեստինյան ՀԱՄԱՍ խմբավորման հարձակումից հետո, գրում է BBC-ի ռուսական ծառայությունը։
Ակնկալվում է, որ այցի ընթացքում Ֆրանսիայի ղեկավարը կոչ կանի «պաշտպանել խաղաղ բնակիչներին» Գազայի հատվածում, մինչդեռ Իսրայելն օդային հարվածներ է հասցնում պաղեստինյան անկլավին և պատրաստվում է ցամաքային հարձակման, գրում է AFP-ն՝ վկայակոչելով նախագահի գրասենյակին։
Նախատեսվում են Ֆրանսիայի նախագահի հանդիպումները վարչապետ Բենիամին Նեթանյահուի և նախագահ Իցհակ Հերցոգի հետ։ Բացի այդ, ըստ AFP-ի, Թել Ավիվում Մակրոնը պետք է հանդիպեր ՀԱՄԱՍ-ի հարձակման հետևանքով զոհված կամ Գազայի հատվածում պատանդ պահված ֆրանսիացի և ֆրանկո-իսրայելցի քաղաքացիների ընտանիքների հետ։
Դատելով Reuters-ի հրապարակած լուսանկարներից՝ այդ հանդիպումը տեղի է ունեցել հենց Թել Ավիվի Բեն Գուրիոն օդանավակայանում։
Ֆրանսիայի առնվազն յոթ քաղաքացի դեռևս անհետ կորած է համարվում։ Ենթադրվում է, որ նրանք բոլորը պատանդառվել են ՀԱՄԱՍ-ի կողմից, սակայն հաստատվել է միայն մեկ ֆրանսուհու գերեվարումը։
Մինչ այս Իսրայել էին ժամանել ԱՄՆ նախագահ Ջո Բայդենը, Մեծ Բրիտանիայի վարչապետ Ռիշի Սունակը և Գերմանիայի կանցլեր Օլաֆ Շոլցը։
