24.11.2024 | 17:00
Ֆրանսիայի Բրոն համայնքում Մեղրի քաղաքի պուրակ է բացվել
Ղազախստանը հերքում է պատժամիջոցների պատճառով ՌԴ արտահանման արգելքը
Քաղաքականություն
20.10.2023 | 22:34
Ղազախստանը հերքել է Ռուսաստան մի շարք ապրանքների արտահանման արգելքի մասին տեղեկությունը՝ կապված Ուկրաինայի դեմ պատերազմի պատճառով ՌԴ-ի նկատմամբ կիրառվող արեւմտյան պատժամիջոցների հետ։ DW-ի ռուսական ծառայության փոխանցմամբ՝ նման հայտարարություն է տարածել Ղազախստանի Առևտրի և ինտեգրման նախարարության մամուլի ծառայությունը։
«Պատժամիջոցների պատճառով Ռուսաստանին 106 տեսակի ապրանքների վաճառքի արգելքի մասին ԶԼՄ-ներում տարածված տեղեկատվության վերաբերյալ Ղազախստանի Առևտրի և ինտեգրման նախարարությունը պաշտոնապես հայտարարում է, որ դա ճիշտ չէ։ Ղազախստանի և Ռուսաստանի միջև առևտրային հարաբերությունները կարգավորվում են Եվրասիական տնտեսական միության մասին պայմանագրի դրույթներին լիովին համապատասխան։ Հակառուսական պատժամիջոցների հետ կապված Ռուսաստանի Դաշնություն որևէ ապրանքի արտահանման արգելք չի սահմանվել»,- ընդգծել է նախարարության մամուլի ծառայությունը։
Նշվում է նաև, որ արտահանման հսկողության ենթակա, այսպես կոչված, երկակի նշանակության ապրանքների առևտուրն իրականացվում է Ղազախստանի միջազգային պարտավորություններին համապատասխան։
«Ղազախստանի օրենսդրության համաձայն՝ նման ապրանքների առնչությամբ անհրաժեշտ է ստանալ համապատասխան լիցենզիա արտահանման, ներմուծման և տարանցման համար։ Արտահանման վերահսկողությունը պատկանում է ազգային իրավասությանը, որը նախատեսված է նաև ԵՏՄ մասին պայմանագրով»,- նշել են գերատեսչության մամուլի ծառայությունից։
Այստեղ նաև պարզաբանել են, որ 106 տեսակի ապրանքներ, որոնց մասին ավելի վաղ նշել էր Ղազախստանի առևտրի և ինտեգրման փոխնախարար Կայրաթ Տորեբաևը, ներառված են երկակի նշանակության ապրանքների ցանկում։
