24.07.2026 | 16:55
Լավրովն ու Արաղչին Պարսից ծոցում էսկալացիան են քննարկել
Բաքուն դժգոհել է Իսպանիայի ու Նիդերլանդների խորհրդարանների բանաձևերից
Քաղաքականություն
19.10.2023 | 18:50
Ադրբեջանի Միլլի Մեջլիսն իր դժգոհությունն է հայտնել Իսպանիայի ու Նիդերլանդների խորհրդարանների ընդունած որոշումներից, որոնցով դատապարտվում են Արցախի դեմ Բաքվի իրականացրած ռազմական ագրեսիան ու էթնիկ զտումը։
Ադրբեջանի և Իսպանիայի միջև միջխորհրդարանական հարաբերությունների աշխատանքային խումբը «կտրականապես մերժում և կտրականապես դատապարտում է» Իսպանիայի Սենատի ընդունած հայտարարությունը։
«Իսպանիայի Սենատի ընդունած հայտարարության տեքստը հստակ ցույց է տալիս, թե որքանով է այն հեռու տարածաշրջանում առկա իրողություններից և հիմնված է հայկական լոբբիի ապատեղեկատվության վրա։ Ադրբեջանի և Իսպանիայի միջև միջխորհրդարանական հարաբերությունների աշխատանքային խումբը խիստ բողոք է հայտնում Իսպանիայի Սենատի այս հայտարարության դեմ»,- ասվում է փաստաթղթում։
Հիշեցնենք,որ հոկտեմբերի 17-ին կայացած լիագումար նիստի ընթացքում Իսպանիայի Սենատը միաձայն ընդունել էր Լեռնային Ղարաբաղի հայության դեմ Ադրբեջանի սանձազերծած ռազմական գործողությունները դատապարտող հայտարարություն:
Մեջլիսի միջազգային հարաբերությունների և միջխորհրդարանական հարաբերությունների հանձնաժողովը խիստ բողոք է հայտնել նաև հոկտեմբերի 12-ին Նիդերլանդների Ներկայացուցիչների պալատի կողմից ընդունված փաստաթուղթը։ Բաքուն այն ընկալում է, «որպես Նիդերլանդների Թագավորության խորհրդարանի Ներկայացուցիչների պալատում ժողովրդավարական արժեքների փլուզման վառ օրինակ»։
Հավելենք, որ Նիդերլանդների խորհրդարանը երկու միջնորդություն էր ընդունել Արցախում էթնիկ զտումների և Հայաստանին ռազմական օգնության տրամադրման հետ կապված։
