17.12.2025 | 20:23
Նազիկ Ավդալյան․ Քաղաքականությամբ զբաղվելու նպատակ չունեմ
Լևոն Քոչարյանի կալանքի ժամկետը երկարացվել է 2 ամսով
Հասարակություն
19.10.2023 | 09:49
Հայաստանի երկրորդ նախագահ Ռոբերտ Քոչարյանի որդու` Լևոն Քոչարյանի կալանքի ժամկետը երկարացվել է երկու ամսով: Երևանի քրեական դատարանի դատավոր Մասիս Մելքոնյանը գիշերը, ժամը 03:30-ի սահմաններում է որոշումը հրապարակել` շուրջ 14 ժամ տևած միջնորդության քննությունից հետո 30 րոպեով առանձին սենյակ (ըստ նախկին քրեական դատավարության օրենսգրքի` խոհրդակցական սենյակ) հեռանալուց հետո: Այս մասին հայտնում է Քոչարյանի պաշտպաններից Ալեքսանդր Կոչուբաևը:
Լևոն Քոչարյանը մեղադրվում է Կառավարության շենքի դիմաց վարչապետ Նիկոլ Փաշինյանի հրաժարականի պահանջով ցույցերից մեկի ժամանակ իշխանության ներկայացուցիչ հանդիսացող ոստիկանների նկատմամբ բռնություն գործադրելու համար, մեղադրանքը չի ընդունում, պնդում է, որ ոստիկաններն են իր նկատմամբ բռնություն գործադրել: Նա արգելանքի էր վերցվել սեպտեմբերի 22-ին, և նրա նկատմամբ կալանքը որպես խափանման միջոց էր ընտրվել մեկ ամսով, այսինքն` այս ժամկետը լրանում է հոկտեմբերի 22-ին: Այսօր հոկտեմբերի 19-ն է, այսինքն` Քոչարյանի մեկամսյա կալանքի ժամկետի ավարտին դեռևս 3 օր կա, սակայն Մասիս Մելքոնյանը երեկ, աշխատանքային օրվա ավարտով պայմանավորված, չի հետաձգել նիստը և միջնորդությունը, փաստորեն, քննել է մինչև գիշեր:
Դատավորի նման շտապողականության պատճառը կարող է լինել այն հանգամանքը, որ այսօր Լևոն Քոչարյանի խափանման միջոցի գործով ևս մեկ որոշում է սպասվում` Վերաքննիչ դատարանից:
Մասնավորապես` Քոչարյանին առաջին անգամ կալանավորելու որոշման դեմ նրա պաշտպանները ներկայացրել են բողոք, որի վերաբերյալ որոշումը դատավոր Մհեր Արղամանյանը պետք է հրապարակի այսօր:
Եթե Արղամանյանն ավելի վաղ հրապարակեր դատական ակտը, և օրինակ, որոշեր բեկանել Քոչարյանին առաջին անգամ կալանավորելու որոշումը, կստեղծվեր իրավիճակ, որ Մասիս Մելքոնյանը քննում է Լևոն Քոչարյանի կալանքի ժամկետը երկարացնելու միջնորդություն այն դեպքում, երբ նրան առաջին անգամ կալանավորելու որոշումը բեկանվել է:
Արաքս Մամուլյան
