24.11.2024 | 13:22
ՏԿԵ նորանշանակ նախարարն ընտրվել է ՔՊ Արմավիրի տարածքային կազմակերպության խորհրդի նախագահ
Պեկինում հանդիպման ժամանակ Պուտինն ու Սին հաստատել են համագործակցությունը զարգացնելու մտադրությունը
Քաղաքականություն
18.10.2023 | 17:04
Չինաստանի ղեկավար Սի Ցզինպինը և ՌԴ նախագահ Վլադիմիր Պուտինը հաստատել են իրենց երկրների միջև համագործակցությունը զարգացնելու մտադրությունը։ Մոսկվայի և Պեկինի միջև ռազմավարական կոորդինացումը մնում է սերտ և արդյունավետ, իսկ երկկողմ առևտրի ծավալները հասել են պատմական մակարդակի, ասել է Սին Պուտինի հետ «Մեկ գոտի, մեկ ճանապարհ» գագաթնաժողովի շրջանակում բանակցություններում։ Չինաստանի ղեկավարի խոսքով՝ Պեկինի և Մոսկվայի միջև քաղաքական վստահությունը մշտապես խորանում է, փոխանցում է DW-ի ռուսական ծառայությունը:
Իր հերթին, Պուտինը նշել է Չինաստանի հետ սերտ արտաքին քաղաքականության համակարգման կարևորությունը միջազգային բարդ օրակարգի համատեքստում։ Ռուսաստանի Դաշնությունն ու Չինաստանը հենց այդպես են կառուցում իրենց համագործակցությունը, մատնանշել է նա։
ՌԴ նախագահը նշել է նաև երկկողմ ապրանքաշրջանառության ծավալների զգալի աճը և առաջարկել այս տարի գերազանցել 200 միլիարդ դոլարի շեմը։
Մինչ Պուտինի ելույթի մեկնարկը մի քանի եվրոպացի պատվիրակներ լքել են դահլիճը, հայտնում է Reuters-ը։ Նրանց թվում է եղել պահպանողական քաղաքական գործիչ Ժան-Պիեռ Ռաֆարենը, որը ղեկավարել է Ֆրանսիայի կառավարությունը 2002-2005 թվականներին։
Միևնույն ժամանակ, բացելով «Մեկ գոտի, մեկ ճանապարհ» գագաթնաժողովը՝ Սի Ցզինպինը քննադատել է Արևմուտքի կողմից տնտեսական պատժամիջոցների սահմանումը:
«Մենք դեմ ենք միակողմանի պատժամիջոցներին, տնտեսական սահմանափակումներին, մեկուսացմանը և մատակարարման շղթաների խզմանը»,- ասել է նա և խոստացել չմասնակցել «առճակատմանը և աշխարհաքաղաքական խաղերին»:
